قازاقستاندا بالالارعا قاتىستى زورلىق، قاتىگەزدىك جانە بۋللينگ فاكتىلەرىنە ارەكەت ەتۋدىڭ ءبىرىڭعاي ۆەدومستۆوارالىق الگوريتمى بەكىتىلدى، دەپ حابارلايدى Dala News.
قۇجات «قۇقىق بۇزۋشىلىقتاردىڭ الدىن الۋ تۋرالى» زاڭ اياسىندا قابىلدانىپ، العاش رەت بارلىق جاۋاپتى ورگانداردىڭ مىندەتتەرىن ناقتى ءبولىپ بەردى. ەندى پوليسيا، ءبىلىم بەرۋ ۇيىمدارى، مەديسينا قىزمەتكەرلەرى جانە قامقورشىلىق ورگاندارى ءبىر جۇيە بويىنشا ارەكەت ەتەدى.
جاڭا الگوريتمگە سايكەس، بالا قۇقىعى بۇزىلعانى تۋرالى كەز كەلگەن اقپارات ناقتى مەرزىمدەرمەن ىسكە قوسىلاتىن مىندەتتى ارەكەتتەر تىزبەگىن باستايدى.
نەگىزگى جاڭالىقتىڭ ءبىرى كەيس مەنەدجەرلەر ينستيتۋتىنىڭ ەنگىزىلۋى بولدى. ءاربىر جاعداي بويىنشا ناقتى ءبىر مامان بەكىتىلەدى. ول بارلىق قىزمەتتەردىڭ جۇمىسىن ۇيلەستىرىپ، بالانىڭ قۇقىقتارى تولىق قالپىنا كەلگەنگە دەيىن سۇيەمەلدەيدى. بۇل جاۋاپكەرشىلىكتىڭ ءار ورگان اراسىندا جوعالىپ كەتۋىنە جول بەرمەيدى.
ەرەجەدە ارەكەت ەتۋ مەرزىمدەرى دە العاش رەت ناقتى بەكىتىلگەن. زورلىق فاكتىسى تۋرالى اقپارات بىردەن بارلىق ۋاكىلەتتى ورگاندارعا بەرىلەدى. ءبىر ساعات ىشىندە بالا قۇقىقتارىن قورعاۋ ورگانىنا جولدانادى. ءبىر جۇمىس كۇنى ىشىندە كەيس مەنەدجەر تاعايىندالىپ، بالانىڭ تۇرمىس جاعدايى تەكسەرىلەدى. ءۇش جۇمىس كۇنى ىشىندە ماتەريالدار كامەلەتكە تولماعاندار ءىسى جونىندەگى كوميسسياعا جىبەرىلۋى ءتيىس.
ەندى تەك رەسمي ارىز عانا ەمەس، بالالاردىڭ وزىنەن تۇسكەن سيگنالدار، 111 بايلانىس ورتالىعى، الەۋمەتتىك جەلىلەر مەن بۇقارالىق اقپارات قۇرالدارىنداعى مالىمەتتەر دە نەگىز بولادى. بۇل ىسكە ءموبيلدى توپتار مەن پسيحولوگيالىق قولداۋ ورتالىقتارى دا تارتىلعان.
بالالارعا كورسەتىلەتىن كومەك ءبىرىڭعاي ستاندارت بويىنشا جۇزەگە اسادى. ول مەديسينالىق، پسيحولوگيالىق، پەداگوگيكالىق، الەۋمەتتىك جانە قۇقىقتىق قولداۋدى قامتيدى.
ماڭىزدى وزگەرىستىڭ ءبىرى ەندى تەك زورلىق كورگەن بالالار عانا ەمەس، سونداي جاعدايدىڭ كۋاسى بولعان بالالار دا مەملەكەتتىك قورعاۋعا الىنىپ، مىندەتتى تۇردە سۇيەمەلدەۋگە جاتقىزىلاتىن بولدى.
