Almatydaǵy elitaly úidiń turǵyny kúzetshini asqan jaýyzdyqpen óltirgen. Kólikpen úsh ret myjyp, shalajansar kúzetshini tepkilegen. Turǵyndardyń sózinshe, kúdikti mas kúide kólikke otyryp ketpek bolǵan eken. Kúzetshi jigit ony toqtatýǵa tyrysyp, rólge otyrmaýyn ótingende, kóligimen taptaǵan, - dep habarlaidy Dalanews.kz.
"KTK" telearnasyna marqumnyń jaqyndary men kópqabatty úidiń turǵyndary qaiǵyly jaitqa qatysty pikir bildirgen.
Ońbai jaralanǵan jigit aýrýhanaǵa jetkizilgenimen, tilge kelmesten jan tapsyrdy. Nurbol Qaiypbaevtyń artynda kámeletke tolmaǵan úsh balasy qaldy.
Turǵyndardyń aitýynsha, bul oqiǵaǵa ekeýiniń arasyndaǵy kikiljiń sebep bolǵan. Kúdikti azamat kólikti masań kúide aidap, qalaǵa shyǵýǵa tyrysqan. Kúzetshi oǵan bul áreketiniń zańǵy qaishy ekenin túsindirýge tyrysypty.
"Ol qaqpadan shyqpaq boldy. Nurbol ony toqtatpaq boldy. Endi mas adam, jolǵa shyqsa qansha adamdy óltiredi. Sosyn Nurbol kóterilip keldi, ol qaitadan ainalyp keldi. Nurbol ana jerge kóligin qoidy dedi de, baryp shlagbaýymdy japty, qaqpanyń bireýin jaýyp, ekinshisin jaýyp jatqan kezde anaý qatty kelip úsh ret qaqty. Onyń aldynda syranyń shólmegimen dúńgirshekti shaqty", - deidi páter ieleri kooperativiniń direktory Áliia Dosmaiylova.
"Tek osy bir er adam ǵana únemi shýlatyp júredi. Nashaqor, iship-shegedi. Keshe de iship-shegip alǵan. Oqiǵa áli kóz aldymyzdan keter emes. Asqan qatygezdik qoi bul. Kúzetshi Nurbol únemi kúdikti azamatqa, onyń otbasyna, bárimizge kómektesip júretin. Qaskói buǵan deiin osyndaǵy dispetcherge soqqy jasaǵan. Talai ret politsiiaǵa jazǵanbyz. Bilmeimin, ata-anasy únemi qorǵap alyp shyǵady", - deidi Danelia Sartai.
Sumdyq oqiǵa bolǵan turǵyn úi kesheniniń aýmaǵy qanǵa boialyp jatyr. Kýágerlerdiń aitýynsha, kúzetshi er adam bul jerde shamamen 5-10 minýttai qansyrap jatyp, artynsha aýrýhanada kóz jumǵan. Marqumnyń artynda shyryldap úsh balasy qaldy, olar 14, 10 jáne 5 jasta.
Nurbol Qaiypbaev otbasynyń jalǵyz asyrýshysy bolǵan. Turǵyn úi kesheninde ol eki jyldan beri 165 myń teńge ailyqqa jumys istep kelipti. Anasy jazda 42 jasqa tolar edi dep botadai bozdap otyr.
"Balamnyń ne jamandyq jasaǵanyn bilmeimin ǵoi, biraq balam ańqyldaq bolatyn. Eshkimge jamanshyldyǵy joq edi. Balam joq qoi. Balamnyń ornyn nemen toltyrady alady?! Bilmeimin ǵoi, nemen toltyra alatynyn", - deidi marqumnyń anasy Maira Qaiypbaeva.
"Keshe ekinshi táýligi bolǵan. Búgin úige kelý kerek edi. Tańerteń habarlasyp edim, basqa bir kisi telefon aldy da, "siz joldasysyz ba, Nurbol qazir aýrýhanada" dedi. Ondai adamdy shyǵarmaý kerek. Qaitadan taǵy bireýdi óltiredi. Ony óltirmeý kerek, túrmede qinaý kerek, ómir boiyna ..." - deidi marqumnyń jary Ásem Moldahýnova.
Bul jaǵdaiǵa qatysty politsiia qylmystyq is qozǵady.
"Kisi óltirý deregi boiynsha qylmystyq is qozǵaldy. Kúdikti er adam qazir ýaqytsha ustaý izoliatoryna qamaýǵa alynǵan. Qylmystyń basqa da mán-jaiy anyqtalyp jatyr", - dedi Almaty PD bastyǵynyń orynbasary Rýstam Sháribaev.
Marqumnyń jaqyndary qylmyskerdiń jazadan sytylyp ketpeýin talap etedi. 45 jastaǵy kúdikti ata-anasymen birge turǵan.
