"بۇگىن ۇيگە كەلۋى كەرەك ەدى": الماتىدا اياۋسىز ولتىرىلگەن كۇزەتشىنىڭ جاقىندارى سۇحبات بەردى

ساعىنىش سارداروۆا 30 ناۋ. 2024 10:57 38498

الماتىداعى ەليتالى ءۇيدىڭ تۇرعىنى كۇزەتشىنى اسقان جاۋىزدىقپەن ولتىرگەن. كولىكپەن ءۇش رەت مىجىپ، شالاجانسار كۇزەتشىنى تەپكىلەگەن. تۇرعىنداردىڭ سوزىنشە، كۇدىكتى ماس كۇيدە كولىككە وتىرىپ كەتپەك بولعان ەكەن. كۇزەتشى جىگىت ونى توقتاتۋعا تىرىسىپ، رولگە وتىرماۋىن وتىنگەندە، كولىگىمەن تاپتاعان، - دەپ حابارلايدى Dalanews.kz.

"كتك" تەلەارناسىنا مارقۇمنىڭ جاقىندارى مەن كوپقاباتتى ءۇيدىڭ تۇرعىندارى قايعىلى جايتقا قاتىستى پىكىر بىلدىرگەن.

وڭباي جارالانعان جىگىت اۋرۋحاناعا جەتكىزىلگەنىمەن، تىلگە كەلمەستەن جان تاپسىردى. نۇربول قايىپبايەۆتىڭ ارتىندا كامەلەتكە تولماعان ءۇش بالاسى قالدى.

تۇرعىنداردىڭ ايتۋىنشا، بۇل وقيعاعا ەكەۋىنىڭ اراسىنداعى كيكىلجىڭ سەبەپ بولعان. كۇدىكتى ازامات كولىكتى ماساڭ كۇيدە ايداپ، قالاعا شىعۋعا تىرىسقان. كۇزەتشى وعان بۇل ارەكەتىنىڭ زاڭعى قايشى ەكەنىن تۇسىندىرۋگە تىرىسىپتى.

"ول قاقپادان شىقپاق بولدى. نۇربول ونى توقتاتپاق بولدى. ەندى ماس ادام، جولعا شىقسا قانشا ادامدى ولتىرەدى. سوسىن نۇربول كوتەرىلىپ كەلدى، ول قايتادان اينالىپ كەلدى. نۇربول انا جەرگە كولىگىن قويدى دەدى دە، بارىپ شلاگباۋىمدى جاپتى، قاقپانىڭ بىرەۋىن جاۋىپ، ەكىنشىسىن جاۋىپ جاتقان كەزدە اناۋ قاتتى كەلىپ ءۇش رەت قاقتى. ونىڭ الدىندا سىرانىڭ شولمەگىمەن دۇڭگىرشەكتى شاقتى"، - دەيدى پاتەر يەلەرى كووپەراتيۆىنىڭ ديرەكتورى ءاليا دوسمايىلوۆا.

"تەك وسى ءبىر ەر ادام عانا ۇنەمى شۋلاتىپ جۇرەدى. ناشاقور، ىشىپ-شەگەدى. كەشە دە ىشىپ-شەگىپ العان. وقيعا ءالى كوز الدىمىزدان كەتەر ەمەس. اسقان قاتىگەزدىك قوي بۇل. كۇزەتشى نۇربول ۇنەمى كۇدىكتى ازاماتقا، ونىڭ وتباسىنا، بارىمىزگە كومەكتەسىپ جۇرەتىن. قاسكوي بۇعان دەيىن وسىنداعى ديسپەچەرگە سوققى جاساعان. تالاي رەت پوليسياعا جازعانبىز. بىلمەيمىن، اتا-اناسى ۇنەمى قورعاپ الىپ شىعادى"، - دەيدى دانەليا سارتاي.

سۇمدىق وقيعا بولعان تۇرعىن ءۇي كەشەنىنىڭ اۋماعى قانعا بويالىپ جاتىر. كۋاگەرلەردىڭ ايتۋىنشا، كۇزەتشى ەر ادام بۇل جەردە شامامەن 5-10 مينۋتتاي قانسىراپ جاتىپ، ارتىنشا اۋرۋحانادا كوز جۇمعان. مارقۇمنىڭ ارتىندا شىرىلداپ ءۇش بالاسى قالدى، ولار 14، 10 جانە 5 جاستا.

نۇربول قايىپبايەۆ وتباسىنىڭ جالعىز اسىرۋشىسى بولعان. تۇرعىن ءۇي كەشەنىندە ول ەكى جىلدان بەرى 165 مىڭ تەڭگە ايلىققا جۇمىس ىستەپ كەلىپتى. اناسى جازدا 42 جاسقا تولار ەدى دەپ بوتاداي بوزداپ وتىر.

"بالامنىڭ نە جاماندىق جاساعانىن بىلمەيمىن عوي، ءبىراق بالام اڭقىلداق بولاتىن. ەشكىمگە جامانشىلدىعى جوق ەدى. بالام جوق قوي. بالامنىڭ ورنىن نەمەن تولتىرادى الادى؟! بىلمەيمىن عوي، نەمەن تولتىرا الاتىنىن"، - دەيدى مارقۇمنىڭ اناسى مايرا قايىپبايەۆا.

"كەشە ەكىنشى تاۋلىگى بولعان. بۇگىن ۇيگە كەلۋ كەرەك ەدى. تاڭەرتەڭ حابارلاسىپ ەدىم، باسقا ءبىر كىسى تەلەفون الدى دا، "ءسىز جولداسىسىز با، نۇربول ءقازىر اۋرۋحانادا" دەدى. ونداي ادامدى شىعارماۋ كەرەك. قايتادان تاعى بىرەۋدى ولتىرەدى. ونى ولتىرمەۋ كەرەك، تۇرمەدە قيناۋ كەرەك، ءومىر بويىنا ..." - دەيدى مارقۇمنىڭ جارى اسەم مولداحۋنوۆا.

بۇل جاعدايعا قاتىستى پوليسيا قىلمىستىق ءىس قوزعادى. 

"كىسى ءولتىرۋ دەرەگى بويىنشا قىلمىستىق ءىس قوزعالدى. كۇدىكتى ەر ادام ءقازىر ۋاقىتشا ۇستاۋ يزولياتورىنا قاماۋعا الىنعان. قىلمىستىڭ باسقا دا ءمان-جايى انىقتالىپ جاتىر"، - دەدى الماتى پد باستىعىنىڭ ورىنباسارى رۋستام شارىبايەۆ.

مارقۇمنىڭ جاقىندارى قىلمىسكەردىڭ جازادان سىتىلىپ كەتپەۋىن تالاپ ەتەدى. 45 جاستاعى كۇدىكتى اتا-اناسىمەن بىرگە تۇرعان.


ۇسىنىلعان
سوڭعى جاڭالىقتار
x