Búgin, 1 qyrkúiek – Bilim kúni Óskemendegi Nurly jol shaǵyn aýdanynda irge kótergen jańa mektepte alǵashqy qońyraý soǵyldy. Qazaq tilinde bilim beretin oqý ordasynyń lentasyn Shyǵys Qazaqstan oblysy ákiminiń orynbasary Erbol Nurǵaliev pen Qazaqstan Jazýshylar odaǵy oblystyq filialynyń direktory, jazýshy Álibek Qańtarbaev qidy.
Jańa mektep 600 balaǵa arnalǵan. Eki aýysymmen jumys isteitin bolǵandyqtan jiyny 1200 balany qamtýǵa áleýetti.
Zamanaýi úlgide salynyp, materialdyq-tehnikalyq bazasy talapqa sai jabdyqtalǵan №50-shi bilim mekemesinde jas urpaqtyń sapaly bilim alýyna barlyq jaǵdai jasalǵan.
Munda inkliýziia kabineti, ashana, sport zaly, dáriger kabineti, úsh sheberhana, radioortalyq, sensorlyq bólme, ata-analardy qoldaý ortalyǵy, muraǵat, kitaphana, robotty tehnika kabineti jáne zerthanasy, akt zaly, psihologiialyq qyzmet jáne logoped kabineti bar.
– Búgin óskemendikter úshin tarihi sát! Oblys ortalyǵy qarqyndy ósip, jańa yqshamaýdandar salynyp, olardyń áleýmettik infraqurylymy búgingi zaman talabyna sai jasalyp jatyr. Sonyń bir kórinisi – jańadan ashylyp turǵan osy mektep. Bul bilim ordasy elimizde Prezidenttiń tapsyrmasymen boi kóterip jatqan «Jaily mektepterden» esh kem emes. Barlyq jaǵdai jasalǵan.
Ahmet Baitursynov: «Eldi túzeý, bala oqytý isinen bastalýy kerek» dep aitqan. Sondyqtan bilim salasyna memleket tarapynan erekshe kóńil bólinýde. Biyldyń ózinde oblysta budan bólek taǵy eki mektep jyl sońyna deiin Zaisan aýdany men Jańa Buqtyrma kentinde ashylady. Sonymen qatar óńirde jeti «Jaily mekteptiń» qurylysy bastaldy. Munyń bári halyqtyń, ósip kele jatqan urpaqtyń igiligi úshin istelip jatyr, – dep atap ótti oblys ákiminiń orynbasary Erbol Nurǵaliev.
Mektep basshylyǵynyń aitýynsha, jańa bilim ordasynda barlyǵy 24 synyp oqidy. Onyń segizi bastaýysh bolsa, 10-y orta býyn, tórteýi joǵary býyn synyptary. Budan bólek eki mektepaldy daiarlyq synyby bar. Nurly jol shaǵyn aýdanynda jańa bilim berý uiymynyń ashylýy balalardy turǵylyqty jeri boiynsha qabyldaýmen qatar pedagogtarǵa jańa jumys oryndaryn ashýǵa múmkindik týǵyzyp otyr.
– Ózim osy aýdanda turamyn. Bul kúndi kópten kúttik. Qurylys barysyn kúnde kórip júrdik. Úlken jumys atqaryldy, qanshama eńbek, qanshama ter tógildi. Oblystyń, qalanyń basshylyǵy kóp kúsh saldy.
Bul mektep Óskemendegi eń zamanaýi, mańdaialdy bilim ordalarynyń biri bolady dep oilaimyn. Búgin ulym jańa mekteptiń tabaldyryǵyn attap, birinshi synypqa baryp jatyr. Búldirshinderimizdiń qadamy qutty, joly ashyq bolsyn, – dedi Nurly jol shaǵyn aýdanynyń turǵyny Daryn Nursaparov.
