بۇگىن، 1 قىركۇيەك – ءبىلىم كۇنى وسكەمەندەگى نۇرلى جول شاعىن اۋدانىندا ىرگە كوتەرگەن جاڭا مەكتەپتە العاشقى قوڭىراۋ سوعىلدى. قازاق تىلىندە ءبىلىم بەرەتىن وقۋ ورداسىنىڭ لەنتاسىن شىعىس قازاقستان وبلىسى اكىمىنىڭ ورىنباسارى ەربول نۇرعالييەۆ پەن قازاقستان جازۋشىلار وداعى وبلىستىق فيليالىنىڭ ديرەكتورى، جازۋشى الىبەك قاڭتاربايەۆ قيدى.
جاڭا مەكتەپ 600 بالاعا ارنالعان. ەكى اۋىسىممەن جۇمىس ىستەيتىن بولعاندىقتان جيىنى 1200 بالانى قامتۋعا الەۋەتتى.
زاماناۋي ۇلگىدە سالىنىپ، ماتەريالدىق-تەحنيكالىق بازاسى تالاپقا ساي جابدىقتالعان №50ء-شى ءبىلىم مەكەمەسىندە جاس ۇرپاقتىڭ ساپالى ءبىلىم الۋىنا بارلىق جاعداي جاسالعان.
مۇندا ينكليۋزيا كابينەتى، اسحانا، سپورت زالى، دارىگەر كابينەتى، ءۇش شەبەرحانا، راديوورتالىق، سەنسورلىق بولمە، اتا-انالاردى قولداۋ ورتالىعى، مۇراعات، كىتاپحانا، روبوتتى تەحنيكا كابينەتى جانە زەرتحاناسى، اكت زالى، پسيحولوگيالىق قىزمەت جانە لوگوپەد كابينەتى بار.
– بۇگىن وسكەمەندىكتەر ءۇشىن تاريحي ءسات! وبلىس ورتالىعى قارقىندى ءوسىپ، جاڭا ىقشاماۋداندار سالىنىپ، ولاردىڭ الەۋمەتتىك ينفراقۇرىلىمى بۇگىنگى زامان تالابىنا ساي جاسالىپ جاتىر. سونىڭ ءبىر كورىنىسى – جاڭادان اشىلىپ تۇرعان وسى مەكتەپ. بۇل ءبىلىم ورداسى ەلىمىزدە پرەزيدەنتتىڭ تاپسىرماسىمەن بوي كوتەرىپ جاتقان «جايلى مەكتەپتەردەن» ەش كەم ەمەس. بارلىق جاعداي جاسالعان.
احمەت بايتۇرسىنوۆ: «ەلدى تۇزەۋ، بالا وقىتۋ ىسىنەن باستالۋى كەرەك» دەپ ايتقان. سوندىقتان ءبىلىم سالاسىنا مەملەكەت تاراپىنان ەرەكشە كوڭىل بولىنۋدە. بيىلدىڭ وزىندە وبلىستا بۇدان بولەك تاعى ەكى مەكتەپ جىل سوڭىنا دەيىن زايسان اۋدانى مەن جاڭا بۇقتىرما كەنتىندە اشىلادى. سونىمەن قاتار وڭىردە جەتى «جايلى مەكتەپتىڭ» قۇرىلىسى باستالدى. مۇنىڭ ءبارى حالىقتىڭ، ءوسىپ كەلە جاتقان ۇرپاقتىڭ يگىلىگى ءۇشىن ىستەلىپ جاتىر، – دەپ اتاپ ءوتتى وبلىس اكىمىنىڭ ورىنباسارى ەربول نۇرعالييەۆ.
مەكتەپ باسشىلىعىنىڭ ايتۋىنشا، جاڭا ءبىلىم ورداسىندا بارلىعى 24 سىنىپ وقيدى. ونىڭ سەگىزى باستاۋىش بولسا، 10-ى ورتا بۋىن، تورتەۋى جوعارى بۋىن سىنىپتارى. بۇدان بولەك ەكى مەكتەپالدى دايارلىق سىنىبى بار. نۇرلى جول شاعىن اۋدانىندا جاڭا ءبىلىم بەرۋ ۇيىمىنىڭ اشىلۋى بالالاردى تۇرعىلىقتى جەرى بويىنشا قابىلداۋمەن قاتار پەداگوگتارعا جاڭا جۇمىس ورىندارىن اشۋعا مۇمكىندىك تۋعىزىپ وتىر.
– ءوزىم وسى اۋداندا تۇرامىن. بۇل كۇندى كوپتەن كۇتتىك. قۇرىلىس بارىسىن كۇندە كورىپ جۇردىك. ۇلكەن جۇمىس اتقارىلدى، قانشاما ەڭبەك، قانشاما تەر توگىلدى. وبلىستىڭ، قالانىڭ باسشىلىعى كوپ كۇش سالدى.
بۇل مەكتەپ وسكەمەندەگى ەڭ زاماناۋي، ماڭدايالدى ءبىلىم وردالارىنىڭ ءبىرى بولادى دەپ ويلايمىن. بۇگىن ۇلىم جاڭا مەكتەپتىڭ تابالدىرىعىن اتتاپ، ءبىرىنشى سىنىپقا بارىپ جاتىر. بۇلدىرشىندەرىمىزدىڭ قادامى قۇتتى، جولى اشىق بولسىن، – دەدى نۇرلى جول شاعىن اۋدانىنىڭ تۇرعىنى دارىن نۇرساپاروۆ.
