Búgin, 18 aqpanda Saýd Arabıasynyń astanasy Er-Rıadta AQSH pen Reseı resmı kelissóz júrgizedi, dep habarlaıdy Dalanews.kz.
Resmı derekterge súıensek, búgin túnde Reseıdiń Syrtqy ister mınıstri Sergeı Lavrov pen Reseı prezıdentiniń kómekshisi Iýrıı Ýshakov Er-Rıadqa taban tiregen. Kelissózder barysynda eki tarap Vladımır Pýtın men Donald Tramptyń aldaǵy kezdesýin talqylaıdy.
Sonymen qatar Ýkraınadaǵy qaqtyǵysty retteý jáne eki el arasyndaǵy yntymaqtastyqty qaıta jandandyrý máseleleri kóterilmek. Kelissóz Astana ýaqytymen 14:00-de bastalady.
Eske salaıyq, buǵan deıin AQSH pen Reseı arasyndaǵy kelissóz 18 aqpanda Saýd Arabıa astanasy Er-Rıadta ótetinin habarlaǵan edik.
Associated Press agenttiginiń málimetinshe, AQSH tarapynan kelissózderge Memlekettik hatshy Marko Rýbıo, Prezıdenttiń ulttyq qaýipsizdik jónindegi keńesshisi Maık Ýolts jáne arnaıy ókil Stıv Ýıtkoff qatysady. Ýıtkoff Saýd Arabıasyna Ýoltspen birge baratynyn rastady.
Aıta keteıik, 12 aqpanda AQSH prezıdenti Donald Tramp Reseı prezıdenti Vladımır Pýtınmen telefon arqyly sóılesti. Kreml kelissózdiń bolǵany týraly derekti rastady jáne Pýtın Trampty Máskeýge shaqyrǵanyn habarlady.
Reseı Federasıasynyń basshysymen sóıleskennen keıin Tramp Ýkraına prezıdenti Vladımır Zelenskııge qońyraý shaldy. Zelenskııdiń aıtýynsha, Tramp Pýtınmen arada bolǵan áńgimemen bólisken. Zelenskıımen sóıleskennen keıin Tramp Ýkraına basshysy Pýtın sıaqty beıbitshilik ornatqysy keletinin aıtty.
Buǵan deıin Pýtın men Tramptyń kezdesýi Saýd Arabıasynda bolýy múmkin ekeni týraly habarlanǵan edi. Sonymen birge arab eli kezdesýdi uıymdastyrýǵa daıyn ekenin bildirdi.
Al Vladımır Zelenskıı Ýkraına óziniń qatysýynsyz jasalǵan beıbit kelisimderge kelispeıtinin aıtty.
"Ýkraına óziniń qatysýynsyz tasada jasalǵan mámilelerge eshqashan kelispeıdi. Dál osyndaı ereje búkil Eýropa úshin qoldanylýy kerek. Ýkraınasyz Ýkraına týraly sheshim joq. Eýropasyz Eýropa týraly sheshim joq. Eýropa týraly sheshim qabyldanǵan kezde Eýropaǵa ústel basynda oryn bolýy kerek", - dedi ol.
Onyń aıtýynsha, Ýkraına men Eýropasyz mámile jasalǵan jaǵdaıda "bári utylady". Sondaı-aq Zelenskıı Pýtınniń AQSH-pen Ýkraına men Eýropanyń qatysýynsyz kelissózder júrgizýge tyrysyp jatqanyn aıtty.
"Sodan keıin ne bolady deısizder me? Pýtın AQSH prezıdentin osy jyldyń 9 mamyrynda Qyzyl alańda turatyndaı etýge tyrysady. Qurmetti kóshbasshy retinde emes, onyń óz qoıylymyndaǵy rekvızıti ispetti. Bizge bul qajet emes. Bizge naǵyz jetistik kerek. Shynaıy beıbitshilik kerek", - dedi Zelenskıı.
Sonymen qatar, Zelenskıı Ýkraına odaqtastarymen birge Vladımır Pýtındi toqtatý úshin qaýipsizdik kepildigin daıyndaýy kerek ekenin atap ótti.
