Keshe, 21 qarashada Ulttyq bank tóraǵasynyń orynbasary Vıtalıı Týtýshkın ulttyq valúta baǵamyna qatysty pikir bildiremin dep ońbaı súrindi. Onyń aıtqan sózi ózge túgili óz ortasynyń jaǵasyn ustatty. Onyń kásibı deńgeıine de kúmán keltirildi, dep habarlaıdy Dalanews.kz.
Aldymen Týtýshkınniń aıtqanyn sol kúıinde bere ketelik.
"Jalpy, 500 degen jáı ǵana san, oǵan baılanyp qalýdyń túkke keregi joq. Búgin – 500, erteń – 600 degendeı, aqsha baǵamy shetel valútasyna qatysty suranys pen usynys qandaı bolady, soǵan qaraı túzile beredi", - dedi ol teńge baǵamyn aqsha aıyrbastaýshy oryndar ózderi belgileı beretinin meńzep Senat dálizinde jýrnalıserdiń AQSH dollarynyń taǵy qymbattaý-qymbattamaýyna qatysty qoıǵan suraqtaryna bergen jaýabynda.
"Mine, saǵan Ulttyq bank tóraǵasy orynbasarynyń kásibı deńgeıi, biz osyǵan laıyq ta shyǵarmyz" dep jazdy ashyna ekonomıs Ǵalymjan Aıtqazın Telegram arnasynda.
"Biz kúni keshe retteýshi organ tóraǵasynyń orynbasary Vıtalıı Týtýshkınniń Senattaǵy esebine syn bildirip, makroekonomıkalyq damýǵa kedergi keltirýshi basty faktorlar týraly jazǵan bolatynbyz. Aýzymyzdy jıyp ta úlgermedik, mine taǵy da... Bizdiń kózqarasymyzsha, teńge baǵamyna qatysty onyń aıtqandary óte sátsiz shyqqan ári kásibı deńgeıge múlde saı kelmeıdi. Birinshiden, Ulttyq banktiń resmı ókili retinde teńge baǵamyna qatysty naqty maǵynada bildirgen onyń pikirin aýyzsha jasalǵan ıntervensıa dep baǵalaýǵa bolady. Bul halyqtyń aqsha baǵamyn aıqyndaýshy qazirgi rejımge degen senimine selkeý túsirip qana qoımaı, sonymen qatar osy prosesti jigin jatqyzyp, tigisin kelistirip jantalasa ter tógip jatqan retteýshi organnyń barlyq eńbegin "devalvasıalaı" salǵan sekildi áser qaldyrady. Ekinshiden, Týtýshkın myrzaǵa degen asa qurmetpen basaı aıta keteıin, teńgeniń aıyrbas baǵamy syrtqy faktorlarǵa ǵana emes, sońǵy jyldary beleń alǵan ishki valútalyq shekteýler men "janama" ıntervensıalar syndy odan da mańyzdy faktorlarǵa táýeldi", delingen jazbada.
Aıta ketsek, búgingi tańda elimizdegi aqsha aıyrbas oryndarynda ortasha baǵamda 1 AQSH dollary 500 teńgeden satylýda.
Sarapshy Aıbar Oljaı qarasha aıynda dollardyń kúsh alýyna túrtki basty faktorlardy atady.
Qazaqstan qarjygerleri qaýymdastyǵy qarjy naryǵyna qatysýshylar arasynda júrgizgen saýalanama nátıjesine sáıkes, 2025 jyly qarasha aıynda bir AQSH dollary 507 teńge bolýy múmkin.
QR Ulttyq bank tóraǵasy Tımýr Súleımenov te sońǵy kezderi kúsh alǵan dollarǵa qatysty óz pikirin bildirgen bolatyn.
Ekonomıkalyq saıasat ınstıtýtynyń dırektory Qaıyrbek Arystanbekov 1 AQSH dollarynyń naqty quny 600 teńge bolýy tıis ekenin, biraq ony Ulttyq bank tejep ustap otyrǵanyn aıtady.
