Májilis depýtaty Elnur Beisembaev úkimettiń qarjy-ekonomikalyq jáne biýdjet saiasatyn synǵa aldy, dep habarlaidy Dalanews.kz.
Onyń aitýynsha, biýdjet qarajatynyń 92%-y mindetti shyǵystarǵa baǵyttalǵan, al bolashaqqa arnalǵan investitsiiaǵa tek 8%-y ǵana qalady. Bul jaǵdai serpindi damýǵa múmkindik bermeidi deidi.
“Mundai jaǵdaida halyqtyń ómir súrý deńgeiin kóterý týraly sóz aitýdyń ózi artyq bolady”, — dep atap ótti ol.
Sonymen qatar ol ulttyq banktiń dollardyń ósýin “jai ǵana san” dep ataǵanyn da qatań synǵa aldy.
“Jaqynda birqatar sheneýnik dollar men teńge baǵamyn “jai ǵana san” dep atap, onyń saldaryn elemeýdi jón kórdi. Biz bul máselege turǵyndardyń turmysy tómen bóligi, iaǵni jalaqydan jalaqyǵa ómir súretin adamdardyń sany áldeqaida kóp ekenin eskerýimiz kerek. Olar úshin dollardyń joǵary baǵamy úlken qiyndyq týǵyzady. Bul rette úkimettiń kimniń múddesin qorǵaityny jóninde suraq týyndaidy: qarapaiym halyqtyń ba, álde oligarhtardyń múddesi me?” – dedi Beisembaev.
Eske salaiyq, Ulttyq bank tóraǵasynyń orynbasary Vitalii Týtýshkin ulttyq valiýta baǵamyna qatysty pikir bildiremin dep ońbai súringen edi. Onyń aitqan sózi ózge túgili óz ortasynyń jaǵasyn ustatty.
"Jalpy, 500 degen - jai ǵana san, oǵan bailanyp qalýdyń túkke keregi joq. Búgin – 500, erteń – 600 degendei, aqsha baǵamy shetel valiýtasyna qatysty suranys pen usynys qandai bolady, soǵan qarai túzile beredi", - dedi ol teńge baǵamyn aqsha aiyrbastaýshy oryndar ózderi belgilei beretinin meńzep Senat dálizinde jýrnalisterdiń AQSh dollarynyń taǵy qymbattaý-qymbattamaýyna qatysty qoiǵan suraqtaryna bergen jaýabynda.
"Mine, saǵan Ulttyq bank tóraǵasy orynbasarynyń kásibi deńgeii, biz osyǵan laiyq ta shyǵarmyz" dep jazdy ashyna ekonomist Ǵalymjan Aitqazin Telegram arnasynda.
"Biz kúni keshe retteýshi organ tóraǵasynyń orynbasary Vitalii Týtýshkinniń Senattaǵy esebine syn bildirip, makroekonomikalyq damýǵa kedergi keltirýshi basty faktorlar týraly jazǵan bolatynbyz. Aýzymyzdy jiyp ta úlgermedik, mine taǵy da... Bizdiń kózqarasymyzsha, teńge baǵamyna qatysty onyń aitqandary óte sátsiz shyqqan ári kásibi deńgeige múlde sai kelmeidi. Birinshiden, Ulttyq banktiń resmi ókili retinde teńge baǵamyna qatysty naqty maǵynada bildirgen onyń pikirin aýyzsha jasalǵan interventsiia dep baǵalaýǵa bolady. Bul halyqtyń aqsha baǵamyn aiqyndaýshy qazirgi rejimge degen senimine selkeý túsirip qana qoimai, sonymen qatar osy protsesti jigin jatqyzyp, tigisin kelistirip jantalasa ter tógip jatqan retteýshi organnyń barlyq eńbegin "devalvatsiialai" salǵan sekildi áser qaldyrady. Ekinshiden, Týtýshkin myrzaǵa degen asa qurmetpen basai aita keteiin, teńgeniń aiyrbas baǵamy syrtqy faktorlarǵa ǵana emes, sońǵy jyldary beleń alǵan ishki valiýtalyq shekteýler men "janama" interventsiialar syndy odan da mańyzdy faktorlarǵa táýeldi", delingenjazbada.
Aita ketsek, búgingi tańda elimizdegi aqsha aiyrbas oryndarynda ortasha baǵamda 1 AQSh dollary 500 teńgeden satylýda.
Sarapshy Aibar Oljai qarasha aiynda dollardyń kúsh alýyna túrtki basty faktorlardy atady.
Qazaqstan qarjygerleri qaýymdastyǵy qarjy naryǵyna qatysýshylar arasynda júrgizgen saýalanama nátijesine sáikes, 2025 jyly qarasha aiynda bir AQSh dollary 507 teńge bolýy múmkin.
QR Ulttyq bank tóraǵasy Timýr Súleimenov te sońǵy kezderi kúsh alǵan dollarǵa qatysty óz pikirin bildirgen bolatyn.
Ekonomikalyq saiasat institýtynyń direktory Qaiyrbek Arystanbekov 1 AQSh dollarynyń naqty quny 600 teńge bolýy tiis ekenin, biraq ony Ulttyq bank tejep ustap otyrǵanyn aitady.
