«Aldyńǵy jazbamdy jalǵastyra otyryp, mektep dırektorlaryn taǵaıyndaýdyń jańa tártibine toqtalyp ótsem.
Shyn máninde, bul — mektep dırektorlary, oqý meńgerýshileri, pedagogter jáne sarapshylarmen birlese bir jyldan astam ýaqyt atqarǵan tynymsyz jumystyń nátıjesi.
Birinshiden, endi mektep dırektorynyń mindetin atqarýshysy bolyp úsh aıdan aspaıtyn jáne bir retten artyq emes merzimde ǵana isteýge bolady. Osy kezeńde konkýrs ótkizilip, jańa basshy taǵaıyndalýy kerek», dep jazdy Ashat Aımaǵambetov.
Onyń atap ótkenindeı, erejede belgilengendeı, mektep dırektorynyń bos nemese ýaqytsha bos laýazymyna konkýrs týraly habarlandyrý bos oryn paıda bolǵannan keıin 7 jumys kúni ishinde bilim basqarmasynyń resmı saıtynda jáne akkaýntynda ornalastyrylýy kerek.
«Osylaısha, bos nemese ýaqytsha bos dırektor laýazymyna konkýrs jarıalamaı aq, jyldar boıy dırektordyń mindetin atqarýshysy bolyp jumys istep júre berýge endi jol berilmeıdi.
Aıtpaqshy, búgingi tańda elimizde mektep basshysy laýazymyna 700-den astam bos jumys orny bar jáne sáıkesinshe ol jerlerde dırektordyń mindetin atqarýshy adamdar jumys istep júr», - dedi mınıstr.
Onyń aıtýynsha, ekinshiden, erejede dırektordyń ýaqytsha bos laýazymyna (bala kútimine baılanysty demalys, oqý jáne t.b.) taǵaıyndaý reglamentteledi. Mundaı jaǵdaılarda da uıym basshysy tikeleı taǵaıyndaý emes, konkýrs arqyly anyqtalady.
Úshinshiden, endi dırektor laýazymyna konkýrsty aýdandyq bilim bólimderi emes, oblystyq bilim basqarmalary ótkizetin bolady. Iaǵnı, konkýrstyq rásimderdi uıymdastyrady jáne dırektorlardy anyqtaıdy. Sodan keıin dırektordyń kandıdatýrasy boıynsha qujattar eńbek shartyn jasasý úshin bilim bólimine jiberiledi. 5 jylǵa taǵaıyndalady.
«Baıqaýdyń ózi birneshe kezeńnen turady:
- kandıdattardyń dırektor laýazymyna qujattardy tapsyrýy;
- bilim basqarmasyndaǵy kadr qyzmetiniń kandıdattyń biliktilik talaptaryna sáıkestigin baǵalaýy, konkýrsqa qatysýǵa ruqsat berýi;
- úmitkerlerge arnalǵan elektrondyq testileý (basqarýshylyq quzyretter, pedagogıka, psıhologıa, QR Zańnamasy boıynsha testileý);
- oqý ornynyń Qamqorshylyq keńesiniń aldynda mekteptiń damý josparyn qorǵaý (testileýdi sátti tapsyrǵan jaǵdaıda);
- Bilim basqarmasyndaǵy áńgimelesý (Qamqorshylyq keńesiniń aldynda mekteptiń damý josparyn sátti qorǵap shyqqan úmitkerler jiberiledi)», dep jazdy Ashat Aımaǵambetov.
Qamqorshylyq keńesteriniń quramyna ata-analar, pedagogıka salasynyń eńbek ardagerleri, qoǵam qaıratkerleri, Úkimettik emes uıymdardyń ókilderi kiredi. Barlyq kezeńnen ótken úmitkermen bilim bólimi tıisti eńbek shartyn jasap, ony dırektor etip taǵaıyndaý týraly buıryq shyǵarady.
«Kandıdattardy Qamqorshylyq keńesimen kelisý boıynsha kóptegen pikirtalas boldy. Biz muny da eskerdik. Endi Qamqorshylyq keńesi dırektor laýazymyna keminde eki kandıdat boıynsha kelisim berýi tıis. Eger kandıdattardyń sany budan az bolsa, onda konkýrs ótkizilmegen bolyp esepteledi jáne qaıta jarıalanady.
Eger Qamqorshylyq keńesi eki márte eki kandıdattan az adam tańdaǵan jaǵdaıda jáne sáıkesinshe konkýrs eki ret ótkizilmegen bolsa, onda konkýrsqa qatysyp jatqan barlyq kandıdat kelesi kezeńge ótedi. Qamqorshylyq keńestiń jumysy men qurý erejesin de qaıta qaraýdamyz «, - dedi ol.
Onyń aıtýynsha, qaǵıdada bolashaq dırektorlarǵa qoıylatyn biliktilik talaptaryna kóp kóńil bólinedi. Munda birneshe erekshelik bar.
Birinshiden, bolashaq dırektorlar mindetti túrde menejment kýrstarynan ótip, tıisti sertıfıkattary bolýy kerek.
Ekinshiden, dırektor laýazymyna basshy retinde jumys ótili bar kásibı muǵalimder taǵaıyndalýy múmkin, al jalpy pedagogıkalyq jumys ótili keminde 5 jyl bolýy qajet.
Úshinshiden, úmitker taǵaıyndalǵanǵa deıin sońǵy eki jyl bilim berý salasynda jumys isteýi tıis.
Bul tarmaq buryn-sońdy qajetti jumys tájirıbesi men pedagogıkalyq eńbek ótili bar, biraq sońǵy jyldary bilim berý salasynda jumys istemegen adamdar mektep dırektory laýazymyna taǵaıyndalǵan tájirıbeniń bolýyna baılanysty engizilip otyr.
20 jyl buryn muǵalim bolyp jumys istegen nemese tipti mektep dırektory bolǵan, degenmen bilim berý salasyndaǵy jańashyldyqtar men oryn alǵan ózgerister týraly habary joq, aýyl ákimdikteriniń nemese ózge de memlekettik organdardyń qyzmetkerleri mektep dırektory bolyp taǵaıyndalatyn.
Tórtinshiden, taǵy bir jańashyldyq — kadr rezervin qurý. Alǵashqy eki kezeńnen (testileý jáne qamqorshylyq keńespen kelisý) sátti ótken, biraq bilim basqarmasynda áńgimelesýden ótpegen kandıdattar endi bir jylǵa rezervke alynýy múmkin.
Bul kandıdattarǵa mekteptiń Qamqorshylyq keńesimen kelise otyryp, bir jyl ishinde dırektor laýazymyna taǵaıyndalý quqyǵyn beredi.
Besinshiden, bıyldan bastap dırektorlardy rotasıalaý ınstıtýty engiziledi.
«Sońǵy birneshe aıda biz erejelerdi ázirlep, sarapshylarmen talqylap jatyrmyz. Dırektorlardy taǵaıyndaý rásimderi men olardy materıaldyq qoldaý jónindegi osy ózgeristiń barlyǵy dırektor laýazymyna laıyqty, barynsha daıarlanǵan kandıdattardy tańdaýǵa jáne bilim berý uıymdary basshylarynyń básekege qabilettiligin arttyrýǵa baǵyttalǵan. Saıyp kelgende bul bilim berý sapasyna áser etedi», - dedi Ashat Aımaǵambetov.
