Qarjy sarapshysy Oljas Baidildinov áleýmettik jelide taǵy da synǵa ushyrady. Asqar Batalovtyń jaryna bergen suhbatynda ol Reseidiń Ýkrainaǵa jasaǵan shabýylyn aqtap alýǵa tyrysqan, dep habarlaidy Dalanews.kz.
Baidildinov depýtat Ermurat Bápidiń Ýkraina Resei agressiiasynan qorǵanýǵa májbúr ekeni jaily aitqan sózderin eske aldy.
“Ermurat Bápi degen depýtatymyz aitady: biz Ýkrainadan birdeńe talap etýge quqymyz joq, óitkeni ol óz territoriiasyna basyp kirgen agressorǵa qarsy qasietti soǵys júrgizip jatyr. Menińshe, parlament agressordy sipattaý nemese “agressor emes” dep baǵalaý quqyǵyna ie bola almaidy. Qasietti soǵys nemese qasietti emes soǵys degenniń kriteriii qandai? Logikalyq turǵydan qarasaq, parlament – zań shyǵarýshy organ ǵoi” – dep pikir bildiredi Oljas.
Suhbat alýshy Aqmaral Batalova da sarapshynyń sózine qosylyp, Reseidi qorǵaýǵa tyrysqan. Ol Býchada bolǵan oqiǵalar “oidan shyǵarylǵan” dep aitady.
“Qazaqstandyq depýtat kórshi, strategiialyq seriktes memleketti "agressor" dep atap otyr. Bul óte oǵash kórinedi. Sonymen qatar sizder Ýkrainaǵa kiiz úiler jetkizdik dep aittyńyzdar. Alǵashqysy Býchada berildi, onda arnaiy operatsiia ótkizilgen. Bul – Ýkraina UQK júrgizgen operatsiia. Bul faktini batys elderi moiyndady. Sondyqtan Býcha jaily Makron ǵana kezdeisoq sóz etti. Búgingi kúnge deiin derekterden, beinematerialdardan, áleýmettik jeliden kórinip turǵandai, orystar eshkimdi óltirmegen. Býchada ortalyq kóshelerde shahmat tárizdi qoiylǵan deneler áskeriler nemese Reseidi qoldaǵan adamdar, olardy jai ǵana atyp tastaǵan”, – deidi Batalova.
Alaida ol osy oqiǵalarǵa kýá bolǵandardy tilge tiek etse de, naqty faktilerdi keltirmeidi.
Aita keteiik, suhbat alýshy Aqmaral Batalovanyń jeke baǵdarlamasyna kóp jaǵdaida reseishil sarapshylar qonaq bolyp keledi.
Eske salaiyq, qarjy sarapshysy Oljas Baidildinov synnan kóz ashpai keledi. Buǵan deiin ol qoǵamdyq kólikterdegi jolaqysy 500 teńge bolýy tiis dep pikir bildirgen edi. Araǵa uzaq ýaqyt salmai, “Qazaqstan antireseilik baǵytqa bet aldy” degen málimdemesimen taǵy da qoǵamnyń ashýyna tidi. Al 2022 jyly Qandy qańtar oqiǵasy qarsańynda sarapshy Oljas Baidildinov suiytylǵan gaz baǵasynyń qymbattaýyna bailanysty el arasynda pikirtalas týdyrdy. Ol kezde Baidildinov “gaz baǵasynyń 15–20 teńgege ósýi aitarlyqtai shyǵyn emes, biz internetke odan da kóp tóleimiz” dep málimdep, halyqty “qoǵamdyq kólikke kóshýge” shaqyrǵan.
