Eldegi ahýalmen tanysyp, Aqordanyń aqparattyq saiasaty, ishki jáne syrtqy saiasattaǵy sheshimderin súzgiden ótkizgen lord Ýorton Toqaevtyń Ýkrainaǵa qatysty ustanymyn tarazyǵa tartyp, kólemdi maqala ázirlegen-tuǵyn.
Avtor Toqaevtyń tusyndaǵy Qazaqstan Reseidiń saiasi ǵana emes, sonymen birge aqparattyq qursaýdan bosap, syrtqy saiasatta derbes áreket etýge talpynyp jatqanyn airyqsha atap ótken.
Ulybritaniia Qazaqstannyń negizgi investorynyń biri, sodan bolsa kerek elimizdegi ózgeristerge barynsha sergek qarap, elegizip otyrady. Batys álemi bizdiń eldi energetikalyq qaýipsizdikke kepil bolatyn odaqtas dep esepteidi.
Ýkrainaǵa basyp kirgen Kremldiń saiasaty ulan-ǵaiyr aýmaǵy Reseimen shektesetin Aqordany oiǵa batyrdy.
Britan saiasatkeri óz maqalasynda Qazaqstan prezidentiniń Reseimen qarym-qatynasta barynsha baisaldy, teń dárejeli bailanys ornatqanyn tilge tiek etken.
"Toqaev Pýtinge kóńil bólýdi qaperden shyǵarmaidy. Dese de, sheshim qabyldaýǵa kelgende Reseidiń yǵyna jyǵylmai, ishki-syrtqy máselede Kremldiń Aqordaǵa yqpal etýine jol bermei otyr.
Jańa Qazaqstan kórshi elden aǵylyp jatqan aqparattyq tasqynnyń betin qaitardy. Qazaqstandyq qoǵam Ýkrainadaǵy ahýalǵa Reseidiń kózimen qaramaidy", – deidi lord Ýorton.
Onyń paiymdaǵanyndai Ulybritaniia Qazaqstandaǵy saiasi ahýaldyń ýaqyt óte óz arnasyn taýyp, eldegi demokratiialyq qundylyqtardyń irgetasy nyǵaiady dep senedi.
Bul tarapta negizgi salmaq álemdik liderlermen tilmashsyz-aq til tabysa alatyn prezidentke Toqaevqa túsedi.
Onyń diplomat retindegi qarym-qabileti synalar shaq áli alda.
Tisqaqqan britan saiasatkeriniń baǵalaýynsha Toqaevtyń Qazaqstannyń ulttyq múddesin qorǵaýdaǵy ustanymy nyq. Ádiletti Qazaqstannyń kóshbasshysy Orta Aziia aimaǵynda Reseidiń ámirine baǵynbaityn jańa, táýelsiz kontseptsiiany ázirleýge talpynyp jatyr.
"Kreml kindik Aziiadaǵy kún ótken saiyn quldyrap bara jatqan abyroi-bedelin túrli saiasi bopsanyń kómegimen qalpyna keltirgisi keledi. Sonyń ishinde Soltústik Qazaqstanǵa qatysty qýlyq-sumdyqqa toly, jalǵan propagandany úiip-tógip, Aqordany óz ýysynda ustaýǵa tyrysyp baǵýda.
Atalǵan aimaqtyń keibir faktorlary Qyrym, Lýgansk, Donetsk oblystaryna uqsas. Qazaqstannyń teriskeiindegi aýditoriia reseilik aqparattyq keńistiktiktiń yqpalynda otyrǵany ótirik emes.
Dese de, kóptegen qazaqstandyqtar Pýtinniń shapqynshylyǵyn qoldamaidy. Ultyna, ulysyna qaramai basqynshylarǵa qarsy jankeshtilikpen kúresip jatqan Ýkrainany qoldaidy", – deidi lord Ýorton óz maqalasynda.
Sóziniń jany bar. Qazaqstan ajaldan qashqan reseilikterge pana bolýda. Pýtinniń mobilizitsiiasy bastalǵaly beri 200 myńǵa tarta reseilik atajurtyn tastap, Qazaqstanǵa qonys aýdarýǵa májbúr boldy. Qazaq halqy olardyń keýdesinen keri itergen joq, kerisinshe qoldan kelgenshe kómek kórsetýde.
