QR Prezidenti Qasym-Jomart Kemeluly Toqaev keshegi halyqqa Úndeýinde «Sý tasqyny bolǵan aimaqtarda birde-bir adam eskerýsiz qalmaidy, barlyǵyna memleket tarapynan kómek bolady» degen edi. Osy tapsyrmaǵa sáikes, BQO-da sý tasqynynan zardap shekken otbasylardyń balalary respýblikalyq saýyqtyrý lagerlerinde demalatyn boldy, – dep habarlaidy Dalanews.kz BQO ákiminiń baspasóz qyzmetine silteme jasap.
– Balanyń aty bala ǵoi. Evapýnktte ishteri pysady. Endi olar lagerlerge baryp, kóńilderi sergip, jaqsy demalyp qaitatyn boldy. Balalar otbasyna oralǵansha tasqynnyń beti qaityp, qalypty tirligimizge qaita oralarmyz. Bar jaǵdaiymyzdy jasaýǵa tyrysqany úshin bilik ókilderine, otandastarymyzǵa óte rizamyn. Elimiz aman, jurtymyz tynysh bolǵai! – dep Jansulý Tóreshova esimdi ata-ana alǵysyn bildirdi.
Batys Qazaqstan oblystyq bilim basqarmasynyń bólim basshysy Hajarbibi Iskanderova bergen málimetke sensek, demalys oryndaryna 185 oqýshy barady dep josparlanǵan. Olar – Bórli, Qaratóbe, Syrym, Terekti aýdandary men Oral qalasynyń balalary.
Qazirgi tańda demalys ornyna joldanǵan baladardyń alǵashqy legi jolǵa shyqty. Birinshi lekpen attanǵan 70 bala 10-24 sáýir aralyǵynda Almaty oblysyndaǵy "Taý Janashar" saýyqtyrý lagerinde demalady.
Al 13 bala 10-30 sáýir aralyǵynda Almaty qalasyndaǵy "Bóbek" saýyqtyrý ortalyǵynda demalady. Odan bólek 102 bala Qyzylorda oblysy Qazaly qalasyndaǵy "Kambash" saýyqtyrý ortalyǵyna joldandy. Ol jaqta oqýshylar 10 kún demalatyn bolady,-dedi bilim basqarmasynyń bólim basshysy Hajarbibi Iskanderova.
– Bizdiń úi sý kiretin bolǵan soń bizderdi avtobýspen sport zalǵa jetkizdi. Al, búgin bizderdi Almatyǵa lagerge jiberip jatyr. Qasymda evakýtsiialyq pýnktte tanysqan dostarym da bar. Men buryn Almatyda bolmaǵan edim, ol jaqtaǵy demalysymyz jaqsy ótedi degen oidamyn. Bizderdi Almaty qalasyna jibergen aǵa-apalarǵa, ata-anama rizamyn, – deidi qýanyshyn jasyra almaǵan J. Dosmuhamedov atyndaǵy MBBK oqýshysy Orazbek Syrymbek.
