Batys Qazaqstan oblysynyń ákimi Nariman Tóreǵaliev Qytaiǵa issapary aiasynda Liaonin provintsiiasynyń ákimshilik ortalyǵy – Shenian qalasynyń iri biznes ókilderimen kezdesti. Is-shara Qazaqstan Respýblikasynyń Qytai Halyq Respýblikasyndaǵy Elshiliginiń qoldaýymen uiymdastyryldy, dep habarlaidy dalanews.kz.
Mańyzdy kezdesý – Memleket basshysy Qasym-Jomart Toqaevtyń syrtqy ekonomikalyq bailanystardy nyǵaitý jáne investitsiialyq yntymaqtastyqty odan ári tereńdetý jónindegi tapsyrmalaryn oryndaýǵa baǵyttalǵan kezekti is-shara. Keiingi 3 jylda Batys Qazaqstan oblysy Qytaidyń 5 provintsiiasymen tyǵyz bailanys ornatty.
Basqosýǵa 70-ten astam kásipker qatysty. Olarǵa Aq Jaiyq óńiriniń investitsiialyq áleýeti týraly beinerolik kórsetildi. Aimaq basshysy memleket tarapynan sheteldik investorlardy qoldaý sharalaryna toqtalyp, biznes qaýymdastyǵyn oblys aýmaǵynda naqty jobalardy iske asyrýǵa shaqyrdy.
- Bizdiń óńir de, Shenian qalasy da — mańyzdy ónerkásiptik jáne kólik-logistikalyq ortalyqtar. Toǵyz joldyń torabynda ornalasqan oblysymyz — investorlar úshin qolaily aimaq. Biz áleýetimizdi odan ári arttyrý arqyly zamanaýi óndiris oryndaryn ashýǵa jáne halyqaralyq seriktestikti damytýǵa árqashan múddelimiz, — dedi Nariman Tóreǵaliev.
BQO kásipkerlik jáne indýstriialyq-innovatsiialyq damý basqarmasynyń basshysy Nurjan Ótepbaev óńirde investitsiialyq jobalardy súiemeldeý boiynsha naqty júie qalyptasqanyn jáne infraqurylymmen qamtamasyz etilgen óndiristik alańdar jasaqtalǵanyn atap ótti. Sondai-aq salyqtyq jeńildikter týraly túsindirdi.
Kezdesýde qytailyq kásipkerler de ózderiniń joba-josparlaryn aityp, óńirge investitsiia salýǵa niet bildildi.
- Kásipkerler oblys basshysymen tikelei kezdesip, saýaldaryna jaýap aldy. Bul óte mańyzdy. Menimen birge 15 kompaniianyń jetekshileri keldi. Olar óndiris, aýyl sharýashylyǵy, qurylys siiaqty salalarda jumys isteidi. Bári Qazaqstanǵa sonyń ishinde Batys Qazaqstan oblysyna investitsiia salýǵa nietti. Bul kompaniialar aimaqta jalpy quny 10 milliard dollar bolatyn jobalardy júzege asyrýǵa daiyn, - dedi Qazaqstan-Qytai ekonomikalyq, saýda jáne investitsiialyq qyzmet ortalyǵynyń jetekshisi Fen Haoian.
Aita keteiik, qazir óńirde qytailyq 10 iri kompaniia birqatar salaǵa qarjy quidy. Byltyr BQO men Qytai arasyndaǵy saýda ainalymy 1,5 ese artyp, 175 million dollarǵa jetti.
