Uly Otan soǵysynyń jeńispen aiaqtalǵanyna 80 jyl tolýyna orai Batys Qazaqstan oblysynda keń aýqymdy tarihi-ólketanýlyq is-shara ótti. Atap aitqanda, 3-5 maýsym kúnderi aralyǵynda oblystyq balalar men jasóspirimder týrizm jáne ekologiia ortalyǵy men Jánibek aýdandyq týrizm jáne ekologiia ortalyǵynyń uiymdastyrýymen oblystyq «Aqjaiyqtaný» týristik-ólketanýlyq ekspeditsiiasy uiymdastyryldy,- dep habarlaidy Dalanews.kz
Ekspeditsiianyń basty maqsaty — jas urpaqty patriottyq rýhta tárbieleý, tarihi sanasyn qalyptastyrý, sonymen qatar Jánibek aýdanynyń Uly Otan soǵysy jyldaryndaǵy tarihyn, ardagerlerdiń ómir jolyn, jergilikti eskertkishter men tulǵalardy tanytý.
Ekspeditsiiaǵa 21 bilim alýshy men 3 jetekshi qatysty.
Marshrýt baǵyty: Oral qalasy – Chapaev aýyly – Aqpáter aýyly – Uzynkól aýyly – Jánibek aýyly – Oral qalasy.
Sapardyń alǵashqy kúni qatysýshylar Aqpáter tarihi-ólketaný mýzeiinde boldy. Bul mýzeide aýyl ómiri, ulttyq salt-dástúrler jáne kóne turmystyq jádigerlermen qatar, ashyq aspan astyndaǵy kórmede HIH–HH ǵasyrlardaǵy aýyl sharýashylyq tehnikalary usynylǵan.
Uzynkól jáne T. Jarokov atyndaǵy mektep mýzeilerinde, sondai-aq baýyrlastar ziraty men sý munarasynyń tarihymen tanysqan oqýshylar naqty tarihi derektermen sýsyndady. Batyrlar eskertkishine taǵzym jasap, Máńgilik alaýǵa gúl shoqtary qoiyldy.
Ekspeditsiia barysynda «Jaraly Jánibek» derekti filmi kórsetilip, «Jeńis jolymen» atty kvest uiymdastyryldy. Ardagerlermen kezdesýler ótkizilip, olardyń estelikteri jazylyp alyndy.
Tabiǵat aiasynda bivýak uiymdastyrylyp, oqýshylar dala jaǵdaiyna beiimdelý mashyqtaryn igerdi. Sonymen qatar ulttyq rýh pen salaýatty ómir saltyn nasihattaý maqsatynda «Jailaý» etnotýristik kesheninde sadaq atý, atqa miný sekildi sporttyq sharalar da ótkizildi.
Ekspeditsiia nátijesinde:
- Jánibek aýdanynyń Uly Otan soǵysy jyldaryndaǵy tarihyna qatysty derekter jinaqtaldy;
- Keńes Odaǵynyń Batyrlary men maidanger qyzdar týraly málimetter tolyqtyryldy;
- Oqýshylar eskertkishter men mýzeilerge baryp, tarihi tulǵalarmen tanysty;
- Izdestirý-zertteý jumystary júrgizilip, aýyzsha tarih elementteri tirkeldi.
Ekspeditsiia óz maqsatyna tolyq jetti. Qatysýshylar týǵan ólkesine degen súiispenshiligin tereńdetip, tarihqa jańa kózqaraspen qaraýǵa múmkindik aldy. Mundai jobalar jas býyndy otansúigishtikke, tarihi jadyny qurmetteýge baýlityny sózsiz.
