1 maýsym – Halyqaralyq balalardy qorǵaý kúnine orai Tuńǵysh Prezident atyndaǵy alańda merekelik is-shara uiymdastyryldy. Oǵan oblys ákimi Nariman Tóreǵaliev qatysty, dep habarlaidy dalanews.kz.
Aimaq basshysy aldymen jas daryndar galereiasyn tamashalady. Shyǵarmashylyq kórmede shákirtter jarqyn jetistikteri men tyń jobalaryn tanystyrdy. Óskeleń urpaqtyń ǵylymi izdenisteri, ekologiialyq jáne áskeri-patriottyq baǵyttaǵy bastamalary kópshilik nazaryna usynyldy. Ónerli órender shyǵarmashylyq josparymen bólisti. Sondai-aq jas qutqarýshylar men tártip saqshylary sap túzep, uiymnyń maqsat-mindetterin baiandady.
Merekelik sharanyń saltanatty sátinde oblys ákimi halyqaralyq jáne respýblikalyq bilim básekelerinde óńir namysyn qorǵap, kósh basynan kóringen 90 oqýshyǵa alǵys hat pen 120 myń teńge kólemindegi qarjylai sertifikattardy tabys etti.
Aimaq basshysy balalardyń quqyqtaryn qorǵaý, olardyń sapaly bilim alyp, densaýlyǵyn nyǵaitýyna, shyǵarmashylyq pen sportta shyńdalýyna jaǵdai jasaý – memlekettik saiasattyń basty basymdyqtarynyń biri ekenin aitty. Bul baǵytta óńirde aýqymdy jumystar atqarylýda. Máselen, sońǵy 3 jylda 30 mektep salyndy. Onyń 9-y «Keleshek mektepteri» ulttyq jobasy aiasynda boi kóterse, qazirgi tańda 8 bilim ordasynyń qurylysy júrgizilýde.
— Memleket basshysy Qasym-Jomart Kemeluly atap ótkendei, jas urpaqtyń boiynda «Adal azamat» tujyrymdamasyna sai qaǵidattardy qalyptastyrý – ortaq mindetimiz. Biz búkil qoǵam bolyp balalarymyzdy eńbekqorlyqqa, ýaqyt talabyna sai izdenýge baýlýymyz qajet. Jas urpaqtyń sapaly bilim, sanaly tárbie alýy úshin barlyq jaǵdai jasalyp jatyr. Bul strategiialyq is-sharalar júieli túrde jalǵasa beredi, — dedi oblys ákimi.
Merekelik is-shara jas ónerpazdardyń kontserttik baǵdarlamasymen túiindeldi.
