Batys Qazaqstan oblysynyń ákimi Nariman Tóreǵaliev jumys saparymen Resei Federatsiiasynyń Orynbor oblysyna bardy. Sapar aiasynda ol Orynbor oblysynyń vitse-gýbernatory - Úkimet tóraǵasynyń ekonomikalyq jáne investitsiialyq saiasat jónindegi orynbasary Ignat Petýhovpen kezdesti,- dep habarlaidy Dalanews.kz.
Kezdesýde taraptar saýda-ekonomikalyq yntymaqtastyq pen biznesti damytýdyń negizgi máselelerin talqylady.
Kezdesý barysynda Nariman Tóreǵaliev Batys Qazaqstan oblysynyń investitsiialyq áleýeti týraly aityp, kásiporyndardyń qolaily jumys isteýi úshin zańnamalyq deńgeide birqatar preferentsiialar men jeńildikter qarastyrylǵanyn atap ótti.
Sonymen qatar, BQO ákimi eki óńir arasyndaǵy turaqty áriptestiktiń mańyzdylyǵyna toqtalyp, ekonomikalyq bailanystardyń oń dinamikasyn erekshe atap ótti.
«Bizdiń Prezidentimiz Qasym-Jomart Toqaev Qazaqstan men Resei arasyndaǵy qarym-qatynastar berik ári myzǵymas dostyqtyń úlgisi ekenin únemi atap ótedi. 2024 jyldyń qańtar-qarasha ailarynda Batys Qazaqstan oblysynyń Resei Federatsiiasymen syrtqy saýda ainalymy 681,6 million dollardy qurady», – dedi Nariman Tóreǵaliev.
Bul ózara yntymaqtastyqta Orynbor oblysy erekshe ról atqarady, atalǵan kezeń aralyǵynda eki óńir arasyndaǵy taýar ainalymy 12,1 million dollarǵa jetti. BQO-dan Orynbor oblysyna gaz, qara metall synyqtary men qaldyqtary, arpa eksporttalsa, kerisinshe, Orynbordan dándi jáne sút ónimderi, beton men metall buiymdary jáne basqa da jergilikti naryqta suranysqa ie taýarlar jetkiziledi.
«Osy múmkindikti paidalana otyryp, biznes ókilderin belsendi yntymaqtastyqqa shaqyramyn. Bizde birlesken jobalardy damytý úshin qolaily jaǵdai jasalǵan, ári qajetti qoldaý kórsetýge daiynbyz», – dep atap ótti óńir basshysy.
Saýda-ekonomikalyq máselelerden bólek, kezdesýde densaýlyq saqtaý, bilim, ǵylym, mádeniet, aýyl sharýashylyǵy jáne basqa da salalardaǵy yntymaqtastyq máseleleri talqylandy.
BQO ákimdiginiń baspasóz qyzmeti
Orynbor oblysy vitse-gýbernatory Ignat Petýhov ózara múddeli salalarda yntymaqtastyq ornatýǵa qyzyǵýshylyq bildirdi.
Sonymen qatar, Batys Qazaqstan oblysynyń ákimi Orynbor oblysynyń ókilderin Qazaqstan men Resei arasyndaǵy XXI Óńiraralyq yntymaqtastyq forýmyna qatysýǵa shaqyrdy. Forým jańa birlesken bastamalardy talqylaýǵa jáne áriptestik bailanystardy nyǵaitýǵa arnalǵan alań bolmaq.
Kezdesý sońynda taraptar yntymaqtastyq týraly memorandýmǵa qol qoiý týraly ýaǵdalasty.
