باتىس قازاقستان وبلىسىنىڭ اكىمى ناريمان تورەعالييەۆ جۇمىس ساپارىمەن رەسەي فەدەراسياسىنىڭ ورىنبور وبلىسىنا باردى. ساپار اياسىندا ول ورىنبور وبلىسىنىڭ ۆيسە-گۋبەرناتورى  - ۇكىمەت ءتوراعاسىنىڭ ەكونوميكالىق جانە ينۆەستيسيالىق ساياسات جونىندەگى ورىنباسارى يگنات پەتۋحوۆپەن كەزدەستى،- دەپ حابارلايدى Dalanews.kz.

كەزدەسۋدە تاراپتار ساۋدا-ەكونوميكالىق ىنتىماقتاستىق پەن بيزنەستى دامىتۋدىڭ  نەگىزگى ماسەلەلەرىن تالقىلادى.

كەزدەسۋ بارىسىندا ناريمان تورەعالييەۆ باتىس قازاقستان وبلىسىنىڭ ينۆەستيسيالىق الەۋەتى تۋرالى ايتىپ، كاسىپورىنداردىڭ قولايلى جۇمىس ىستەۋى ءۇشىن زاڭنامالىق دەڭگەيدە ءبىرقاتار پرەفەرەنسيالار مەن جەڭىلدىكتەر قاراستىرىلعانىن اتاپ ءوتتى.

بقو اكىمدىگىنىڭ باسپا ءسوز قىزمەتى

سونىمەن قاتار، بقو اكىمى ەكى ءوڭىر اراسىنداعى تۇراقتى ارىپتەستىكتىڭ ماڭىزدىلىعىنا توقتالىپ، ەكونوميكالىق بايلانىستاردىڭ وڭ ديناميكاسىن ەرەكشە اتاپ ءوتتى.

«ءبىزدىڭ پرەزيدەنتىمىز قاسىم-جومارت توقايەۆ قازاقستان مەن رەسەي اراسىنداعى قارىم-قاتىناستار بەرىك ءارى مىزعىماس دوستىقتىڭ ۇلگىسى ەكەنىن ۇنەمى اتاپ وتەدى. 2024 جىلدىڭ قاڭتار-قاراشا ايلارىندا باتىس قازاقستان وبلىسىنىڭ رەسەي فەدەراسياسىمەن سىرتقى ساۋدا اينالىمى 681،6 ميلليون دوللاردى قۇرادى»، – دەدى ناريمان تورەعالييەۆ.

بۇل ءوزارا ىنتىماقتاستىقتا ورىنبور وبلىسى ەرەكشە ءرول اتقارادى، اتالعان كەزەڭ ارالىعىندا ەكى ءوڭىر اراسىنداعى تاۋار اينالىمى 12،1 ميلليون دوللارعا جەتتى. بقو-دان ورىنبور وبلىسىنا گاز، قارا مەتالل سىنىقتارى مەن قالدىقتارى، ارپا ەكسپورتتالسا، كەرىسىنشە، ورىنبوردان ءداندى جانە ءسۇت ونىمدەرى، بەتون مەن مەتالل بۇيىمدارى جانە باسقا دا جەرگىلىكتى نارىقتا سۇرانىسقا يە  تاۋارلار جەتكىزىلەدى.

«وسى مۇمكىندىكتى پايدالانا وتىرىپ، بيزنەس وكىلدەرىن بەلسەندى ىنتىماقتاستىققا شاقىرامىن. بىزدە بىرلەسكەن جوبالاردى دامىتۋ ءۇشىن قولايلى جاعداي جاسالعان، ءارى قاجەتتى قولداۋ كورسەتۋگە دايىنبىز»، – دەپ اتاپ ءوتتى ءوڭىر باسشىسى.

ساۋدا-ەكونوميكالىق ماسەلەلەردەن بولەك، كەزدەسۋدە دەنساۋلىق ساقتاۋ، ءبىلىم، عىلىم، مادەنيەت، اۋىل شارۋاشىلىعى جانە باسقا دا سالالارداعى ىنتىماقتاستىق ماسەلەلەرى تالقىلاندى.

بقو اكىمدىگىنىڭ باسپا ءسوز قىزمەتى

ورىنبور وبلىسى ۆيسە-گۋبەرناتورى يگنات پەتۋحوۆ ءوزارا مۇددەلى سالالاردا ىنتىماقتاستىق ورناتۋعا قىزىعۋشىلىق ءبىلدىردى.

سونىمەن قاتار، باتىس قازاقستان وبلىسىنىڭ اكىمى ورىنبور وبلىسىنىڭ وكىلدەرىن قازاقستان مەن رەسەي اراسىنداعى XXI ءوڭىرارالىق ىنتىماقتاستىق فورۋمىنا قاتىسۋعا شاقىردى. فورۋم جاڭا بىرلەسكەن باستامالاردى تالقىلاۋعا جانە ارىپتەستىك بايلانىستاردى نىعايتۋعا ارنالعان الاڭ بولماق.

كەزدەسۋ سوڭىندا تاراپتار ىنتىماقتاستىق تۋرالى مەموراندۋمعا قول قويۋ تۋرالى ۋاعدالاستى.