Premer-ministrdiń orynbasary Qanat Bozymbaev Ulytaý oblysynda sý tasqyny kezeńine daiyndyq jumystaryn tekserdi, dep habarlaidy Dala News.
Jumys sapary barysynda vitse-premer Jezdi ózeniniń arnasyndaǵy jaǵdaimen tanysyp, Qarsaqpai, Sarlyq, Qorǵasyn, Boztumsyq jáne Malshybai eldi mekenderin sý tasqynynan qorǵaý sharalaryn qarady. Sondai-aq Qarsaqpai jáne Kenenbai bógetterin tekserip, Jezqazǵan qalasyndaǵy Keńgir sý qoimasyna baryp, óńirdegi ahýal týraly baiandama tyńdady.
Oblys aýmaǵynda sý tasqyny qaýpi bar 27 eldi meken anyqtalǵan. Onyń 8-inde qaýip saqtalyp otyr, al 19 eldi mekende júrgizilgen injenerlik jumystardyń nátijesinde qaýip aitarlyqtai tómendegen.
Daiyndyq aiasynda óńirde 1,6 shaqyrym qorǵanys dambasy salyndy, 3,5 shaqyrym kanal, 3 shaqyrym aryq jáne 350 sý ótkizý qurylysy tazartyldy. Sarysý, Jaman Sarysý, Taldysai, Qarakeńgir, Jezdi ózenderi, sondai-aq Keńgir, Aqtasty jáne Jezdi sý qoimalary turaqty baqylaýda.
Qanat Bozymbaevtyń aitýynsha, óńirdegi gidrometeorologiialyq jaǵdai turaqty bolǵanymen, Sarysý jáne Keńgir ózenderinde sý deńgeiiniń qaýipti mejege kóterilý yqtimaldyǵy bar. Ásirese Jańaarqa aýdanynda qaýip joǵary, al Ulytaý aýdanynda ortasha deńgeide baǵalanýda.
Vitse-premer oblys ákimdigine ózen arnalary men sý ótkizý qurylystaryn tazartý jumystaryn jedeldetip, sý deńgeiin turaqty baqylaýda ustaýdy jáne jaǵdai kúrdelengen jaǵdaida halyqty evakýatsiialaý josparlaryn jańartýdy tapsyrdy.
