Oblys ákimi aldymen Besaǵash aýylyndaǵy blokty-modýldi qazandyqqa bardy. «Gorizont KZ» JShS 2 mlrd. teńgege ornatqan bul qazandyq biylǵy jyldyń qarasha aiynda iske qosylǵan bolatyn. Nysan Besaǵash aýylyndaǵy «Nuriia», «Dinara grýpp», «Alma Taý», «Dostar», «Besaǵash 2» turǵyn úi keshenderine qyzmet kórsetýge arnap salynǵan. Oblys ákimi zamanaýi, jańa ári únemdi, gazǵa qosylǵan qazandyqtyń jumysyn oń baǵalady.
Osy sapar barysynda Qanat Bozymbaevqa Besaǵash aýylynyń ońtústik-batys bóligin damytýdyń jobasy tanystyryldy. Sonyń ishinde «Talgar Eco City», «Aspan siti», «Besagash» jáne «Dostar» turǵyn úi keshenderiniń qurylysy jaily keńinen baiandaldy. Bul rette Qanat Aldabergenuly turǵyn aýmaqtardy damytý isin keshendi túrde qarastyrý kerektigin qatań eskertti.
– Keshendi qurylys josparyna áleýmettik nysandar salýdy da engizý kerek. Iaǵni turǵyn úi keshenin salýshy árbir kásipker biznestiń áleýmettik jaýapkershiligin negizge alýy tiis. Oǵan qosa saiajai massivteri aýmaǵynda infraqurylymmen qamtamasyz etilgen balamaly jer telimin usyna otyryp, turǵyn úilerdi salý múmkindikterin qarastyrý qajet. Qurylys júrgizý barysynda jergilikti jerde óndirilgen materialdardy qoldanýǵa, qazaqstandyq mazmunǵa basymdyq berilýi kerek. Al jumys barysynda týyndaǵan máselelerdi kezeń-kezeńimen sheshemiz, – dedi Qanat Bozymbaev.
Sol siiaqty oblys ákimi Besaǵash aýylyndaǵy Mádeniet úiiniń 3 jyldan beri sozylyp kele jatqan kúrdeli jóndeýine qatysty týyndaǵan máselelerge de nazar aýdardy. «Aýyl – el besigi» jobasymen qolǵa alynǵan qurylys jumystary nysanda órt bolý saldarynan toqtap qalǵan. Oblys ákimi mynadai baiaý qarqynmen merdiger mekeme josparda belgilengen merzimde jóndeý jumystaryn aiaqtai almaityndyǵyn qatań synǵa aldy. Eger kelisimsharttardy oryndamasa, zańǵa sáikes sharalar qabyldaýdy tapsyrdy.
Sapar barysynda sorǵy stantsiiasy men rezervýarlardyń jumysyna da kóńil aýdaryldy. Munda oblys basshysyna buǵan deiin Besaǵashtaǵy «Alma Taý», «Nuriia» JK-laryn sýmen qamtýda týǵan qiyndyqtardy sheshý joldary baiandaldy. Atap ótsek, sý qubyrlary birneshe jerden jarylǵan edi. Sondyqtan qazir sý qubyryn tósegen merdiger mekeme qubyr jelisiniń birinshi tarmaǵyn qaita aýystyryp jatyr. Jumystar jyl sońyna deiin aiaqtalady. Merdiger mekeme ekinshi tarmaqty da sapaly qubyrǵa aýystyratyn boldy. Mundaǵy negizgi qiyndyq - bul JK-larǵa beriletin aýyz sý kózi Almatydan tartylǵan. Sondyqtan Besaǵashtyń ońtústik bóligin aýyz sýmen qamtý jelileriniń qurylysyn júrgizýge qajettilik bar. Osyǵan orai atalǵan joba da oblys basshysyna tanystyryldy.
Jyl boiy úzdiksiz jumys isteitin «Oi Qaraǵai – Lesnaia skazka» taý shańǵy demalys bazasy aýdannyń irgeli týristik nysandarynyń biri. Baza basshylyǵy nysannyń irgesin keńeitip, «Aport Aq-Tas» taý kýrorttyq keshenin salýdy qolǵa almaq. Josparǵa sáikes joba 2025 jylǵa deiin aiaqtalýy tiis. Degenmen oǵan qajetti jol, elektr energiiasy, sý taratqysh siiaqty infraqurylymdarmen qamtýǵa kómek surady. Qanat Bozymbaev taý týrizmin damytý jóninde arnaiy master-jospar ázirlenetinin aitty.
– Taý kýrorttyq keshenin salý – bul úzdik týristik joba. Joba iske asyrylsa, qansha jumys orny ashylady, qansha salyq túsedi, týrister legi qanshaǵa artady, sonyń bárin zerdeleimiz. Jáne osy master-josparda oblystaǵy týrizm salasynyń týyndaǵan máseleleriniń barlyǵy, sonyń ishinde sizder kótergen máseleler de qamtylatyn bolady, – dedi Qanat Bozymbaev.
