Premer-mınıstrdiń orynbasary Qanat Bozymbaev Aqtaýda apatqa ushyraǵan Azerbaijan Airlines (AZAL) ushaǵynyń qara jáshikterindegi derekter qanshalyq saqtalǵanyn aıtty, - dep habarlaıdy Dalanews.kz Massaget.kz-ke siltep.

Bozymbaevtyń sózinshe, qazir sarapshylar jumys istep jatyr.

"Qara jáshikter ashylyp, Qazaqstanǵa qaıtaryldy, Bas prokýratýranyń qoldaýymen tergeý tobynda. Qazir sarapshylar jumys istep jatyr. Bul materıaldardyń kóshirmeleri Ázerbaıjan tarapynda da, Reseı tarapynda da bar. Jasyratyn túgimiz joq", - dedi vıse-premer Úkimettegi brıfıńte.

Aıta keteıik, 2024 jyly 25 jeltoqsanda jergilikti ýaqyt boıynsha 11.30-da Aqtaý mańynda Bakýden Groznyıǵa ushyp bara jatqan ushaq apatqa ushyrady. Bul - Azerbaijan Airlines áýekompanıasyna tıesili Embraer 190 ushaǵy.

Aqparat boıynsha ushaq bortynda 67 adam, onyń ishinde 5 ekıpaj múshesi bolǵan.

Apattan 6 qazaqstandyq kóz jumdy. Jalpy qaza tapqandar sany — 38. Qaıǵyly oqıǵadan 29 adam aman qaldy.

Qaıǵyly oqıǵadan keıin Ázerbaıjanda Jalpyulttyq aza tutý kúni jarıalandy. Túste búkil el boıynsha memlekettik týlar túsirilip, kólikter toqtady. Ázerbaıjandyqtar qaza tapqandardy bir mınýt únsizdikpen eske aldy.