Almaty qalasy Bostandyq aýdany ınvestısıa tartý jáne bıznes úshin qolaıly jaǵdaı jasaý boıynsha qalada kósh bastap keledi. 2024 jyldyń qorytyndysy boıynsha tartylǵan ınvestısıalar kólemi shamamen 8%-ǵa ósip, 430 mlrd teńgeni qurady. Bul týraly Almaty ákimi Erbolat Dosaev Bostandyq aýdany turǵyndarymen kezdesýde aıtty, - dep habarlaıdy Dalanews.kz
Búginde qaladaǵy árbir besinshi shaǵyn jáne orta bıznes sýbektisi Bostandyq aýdanynda. 2024 jyly aýdandaǵy kásiporyn sany ótken jylmen salystyrǵanda 7,3% artyp, sonyń nátıjesinde 12,9 myń turaqty jumys orny ashyldy.
Qurylys kóleminiń 8,5%-ǵa, al bólshek saýdanyń 34%-ǵa ósýi qala ekonomıkasynyń jalpy ósýine yqpal etti jáne salyq túsiminiń 27%-ǵa artýyna (550 mlrd teńgeden astam) sebep boldy.
Qala basshysynyń aıtýynsha, aýdan ekonomıkasynyń qarqyndy damýy 2024 jyly onyń búdjetiniń 38%-ǵa ulǵaıýyna múmkindik berdi, sonyń nátıjesinde búdjet kólemi 29,1 mlrd teńgege jetti. 2025 jyly aýdan búdjeti taǵy 1 mlrd teńgege ósip, 30,1 mlrd teńgege jetti.
«2025 jyly qala jáne aýdan ákimdikteriniń negizgi jumystary ınjenerlik ınfraqurylymdy odan ári jańǵyrtýǵa, sapaly túrde kórkeıtýge jáne Bostandyq aýdany turǵyndarynyń jaılylyǵy men qaýipsizdigin qamtamasyz etýge baǵyttalady», – dedi Erbolat Dosaev.
