Almatynyń Bostandyq aýdanynyń ákimi Sanjar Alin azamattyq belsendi Liýdmila Seńgirbaevanyń ústinen aryz jazǵan. Oǵan azamattyq belsendiniń ákimniń "ámiianyn urlap alýy" sebep bolǵan kórinedi, - dep habarlaidy Dalanews.kz.
Liýdmila Seńgirbaevanyń sózinshe, ol aýdan ákimimen kezdesip, Ermensai aýdanyndaǵy sýmen qamtý máselesin talqylamaq bolǵan. Biyl shaǵynaýdanda jaz boiy sý bolmaǵan eken.
Seńgirbaeva basqa turǵyndarmen birlesip qoǵamdyq baqylaý boiynsha komissiia qurǵan. Al bir ai buryn qala ákimi Erbolat Dosaevpen kezdesýge ótinish jibergen. Sebebi ol Bostandyq aýdanynyń ákimimen tikelei kezdese almai qoiǵan.
Azamattyq belsendiniń sózinshe, sheneýnik qanshama halyq narazylyq bildirse de mán bermepti.
"Komissiianyń alǵashqy otyrysyna Sanjar Alindi shaqyrdyq. Ol shaqyrǵanymyzǵa qulaq aspady. Sosyn biz Dosaevqa hat jazyp, onda Alin qyzmetin durys atqarmaitynyn jáne bizge basqa ákim keregin aittyq", - deidi azamattyq belsendi.
Keiin Liýdmila Seńgirbaevaǵa aýdan ákimimen kezdesýge usynys túsken. Ol kelisip, basqa turǵyndardy jinap, kezdesýge kelgen kezde Alin qala ákimimen shuǵyl kezdesýi keregin aityp, ketip qalǵan.
Belsendiler eki saǵattai kútken. Liýdmila Seńgirbaeva ákimniń kabinetine kirmek bolǵanda ondaǵy qyzmetker esikti ustap turyp, onda kirýge bolmaitynyn aitqan. Al kabinette eshkim bolmaǵan.
Al 31 qazanda Seńgirbaevanyń úiiniń aldyna politseiler kelgen. Olar Sanjar Alin belsendige qatysty aryz jazǵanyn, ákim Seńgirbaeva onyń ámiianyn urlap aldy dep esepteitinin aitqan. Osylaisha azamattyq belsendige qatysty qylmystyq is qozǵalǵan.
Almatynyń politsiia departamenti bul aqparatty rastap otyr. Bul is boiynsha tergeý bir aidai júrýi múmkin. Al Ermensaia aýdanyndaǵy sý máselesi áli sheshilmegen.
