الماتىنىڭ بوستاندىق اۋدانىنىڭ اكىمى سانجار الين ازاماتتىق بەلسەندى ليۋدميلا سەڭگىربايەۆانىڭ ۇستىنەن ارىز جازعان. وعان ازاماتتىق بەلسەندىنىڭ اكىمنىڭ "ءاميانىن ۇرلاپ الۋى" سەبەپ بولعان كورىنەدى، - دەپ حابارلايدى Dalanews.kz Orda.kz-كە سىلتەپ.
ليۋدميلا سەڭگىربايەۆانىڭ سوزىنشە، ول اۋدان اكىمىمەن كەزدەسىپ، ەرمەنساي اۋدانىنداعى سۋمەن قامتۋ ماسەلەسىن تالقىلاماق بولعان. بيىل شاعىناۋداندا جاز بويى سۋ بولماعان ەكەن.
سەڭگىربايەۆا باسقا تۇرعىندارمەن بىرلەسىپ قوعامدىق باقىلاۋ بويىنشا كوميسسيا قۇرعان. ال ءبىر اي بۇرىن قالا اكىمى ەربولات دوسايەۆپەن كەزدەسۋگە ءوتىنىش جىبەرگەن. سەبەبى ول بوستاندىق اۋدانىنىڭ اكىمىمەن تىكەلەي كەزدەسە الماي قويعان.
ازاماتتىق بەلسەندىنىڭ سوزىنشە، شەنەۋنىك قانشاما حالىق نارازىلىق بىلدىرسە دە ءمان بەرمەپتى.
"كوميسسيانىڭ العاشقى وتىرىسىنا سانجار ءاليندى شاقىردىق. ول شاقىرعانىمىزعا قۇلاق اسپادى. سوسىن ءبىز دوسايەۆقا حات جازىپ، وندا الين قىزمەتىن دۇرىس اتقارمايتىنىن جانە بىزگە باسقا اكىم كەرەگىن ايتتىق"، - دەيدى ازاماتتىق بەلسەندى.
كەيىن ليۋدميلا سەڭگىربايەۆاعا اۋدان اكىمىمەن كەزدەسۋگە ۇسىنىس تۇسكەن. ول كەلىسىپ، باسقا تۇرعىنداردى جيناپ، كەزدەسۋگە كەلگەن كەزدە الين قالا اكىمىمەن شۇعىل كەزدەسۋى كەرەگىن ايتىپ، كەتىپ قالعان.
بەلسەندىلەر ەكى ساعاتتاي كۇتكەن. ليۋدميلا سەڭگىربايەۆا اكىمنىڭ كابينەتىنە كىرمەك بولعاندا ونداعى قىزمەتكەر ەسىكتى ۇستاپ تۇرىپ، وندا كىرۋگە بولمايتىنىن ايتقان. ال كابينەتتە ەشكىم بولماعان.
ال 31 قازاندا سەڭگىربايەۆانىڭ ءۇيىنىڭ الدىنا پوليسەيلەر كەلگەن. ولار سانجار الين بەلسەندىگە قاتىستى ارىز جازعانىن، اكىم سەڭگىربايەۆا ونىڭ ءاميانىن ۇرلاپ الدى دەپ ەسەپتەيتىنىن ايتقان. وسىلايشا ازاماتتىق بەلسەندىگە قاتىستى قىلمىستىق ءىس قوزعالعان.
الماتىنىڭ پوليسيا دەپارتامەنتى بۇل اقپاراتتى راستاپ وتىر. بۇل ءىس بويىنشا تەرگەۋ ءبىر ايداي ءجۇرۋى مۇمكىن. ال ەرمەنسايا اۋدانىنداعى سۋ ماسەلەسى ءالى شەشىلمەگەن.
