Qazaqstandyq kásipker Qairat Boranbaevtyń áieli kúieýimen sottasyp, jeńilip qaldy, dep habarlaidy Dalanews.kz.
Sholpan Boranbaeva kúieýine tiesili bolǵan múlikti bólip almaq bolǵan. Áńgime 2023 jyly naýryzda "QazaqGaz" jáne "AziiaGaz Chýndja" arasyndaǵy mámileler kezinde jymqyrý týraly is boiynsha memleket kirisine tárkilengen Almatydaǵy Ál-Farabi dańǵylyndaǵy úi-jai men jer ýchaskesi týraly bolǵan.
Sot daýy materialdarynda "Esentai Tower" biznes ortalyǵy men "Esentai Mall" saýda ortalyǵyna irgeles jatqan eki qabatty ákimshilik ǵimarat týraly sóz qozǵalǵan. Anyqtamalyq málimetterge sáikes, bul ǵimaratta 2 nysan bar - "Tor" jáne "Cafeteria" meiramhanalary.
Eske salaiyq, kásipker Boranbaev áli de tergeý orbitasynda. Oligarh Qairat Boranbaevqa qarsy qylmystyq is QR Qylmystyq kodeksiniń taǵy eki baby boiynsha tergelip jatyr. Bul týraly Qarjylyq monitoring agenttigi tóraǵasynyń orynbasary Jeńis Elemesov málimdedi.
"Ol sottalǵan negizgi qylmystyq is boiynsha 14, 5 milliard teńge kóleminde zalal óteldi, budan basqa ol 120 milliard teńge kóleminde zalaldy ótedi. 120 milliard teńge, oǵan qosa 14,5 milliard teńge - 134 milliard teńge. ...Qylmystyq is áli toqtatylǵan joq, ol tergelip jatyr, taǵy da zalal ótelýi múmkin. ...Oǵan biýdjet qarajatyna qatysty kúdik bar, sondai-aq, salyq tóleýden jaltarý bar", - dedi Elemesov májiliste.
Aita keteiik, byltyr 6 qarashada Qairat Boranbaev bostandyqqa shyqty. Al oǵan deiin naýryzda ol 8 jylǵa sottaldy. Qyrkúiekte jaza merzimi 6 jylǵa deiin qysqardy.
Sonymen qatar, "bai quda" Astananyń ortalyǵyndaǵy 4 juldyzdy qonaqúidi, basqa da biraz múlikti memleket menshigine tapsyrdy. Al aýmaǵy bes myń sharshy metrden asatyn qonaqúi kesheniniń jyldyq ainalymy shamamen 900 million teńgeden asady eken.
