Agenttik Qairat Boranbaevqa qatysty qylmystyq jolmen alynǵan múlikti zańdastyrýǵa bailanysty sotqa deiingi tergeýdi jalǵastyryp jatyr.
Tergeý barysynda jalpy quny 90 mlrd teńgeden asatyn aktivterdi, onyń ishinde: munai ken ornyn, gaz taratý kompaniiasyn, servis salasyndaǵy kásiporyndy, qonaq úi jáne saýda-oiyn-saýyq keshenderin, fitnes ortalyqtar jelisin, keńse úi-jailaryn jáne basqa da aktivterdi memleket menshigine erikti túrde qaitarý jóninde sharalar qabyldandy.
Sondai-aq Qairat Boranbaev Bilim berý infraqurylymyn qoldaý qoryna 30 mlrd teńge aýdardy. Osy obektilerdiń barlyǵy memlekettik organdar men kompaniialardyń balansyna berilip, al aqshalai qarajat bilim berý infraqurylymyn damytý úshin paidalanylady, – delingen aqparatta.
Buǵan deiin Qairat Boranbaev tabiǵi gaz importy kezinde qarajatty jymqyrý epizody boiynsha tergeý aiasynda 14,5 mlrd teńge kóleminde materialdyq shyǵyndy ótegen.
Aita keteiik, Boranbaevqa sot úkimi 2023 jyldyń 31 naýryzynda shyqty. Qairat Boranbaev pen Roman Nahanov 8 jylǵa bas bostandyǵynan aiyryldy. Qylmystyq is boiynsha sottalýshy – Qazaq Gaz AQ basqarma basshysynyń burynǵy orynbasary Taiyr Januzaq ta 8 jylǵa sottaldy. Ol sot zalynan qamaýǵa alyndy.
Sodan keiin Astananyń qylmystyq ister jónindegi sot alqasy Resei gazynyń baǵasy týraly aqparatty qamtityn qujat túpnusqasynyń bolmaýyna bailanysty birinshi instantsiiadaǵy sot úkiminiń kúshin joidy.
22 tamyzda Astananyń qylmystyq ister jónindegi apelliatsiialyq sot alqasy qazaqstandyq kásipker Qairat Boranbaevqa qatysty isti qarady. Boranbaevtyń advokaty Daniiar Qanafin memlekettik aiyptaýshymen protsestik kelisimge kelý týraly ótinishhat joldady.
Tamyzda Astana qalalyq sotynda Qairat Boranbaevtyń isi boiynsha apelliatsiialyq kelisim qaraldy. Otyrysta kásipker kinásin moiyndap, zalaldy ótegisi keletinin málimdegen.
