Qazaqstannyń bólshek nesielendirý naryǵyndaǵy birneshe jyl boiǵy ósim óz aptyǵyn basty. 2024 jyldyń qorytyndysy boiynsha,jańa klientter aǵynynyń qarqyny kúrt baiaýlaǵan, dep habarlaidy Dalanews.kz.
Bólshek nesielendirý qyzmetine júginýde jańa klientterdiń aǵyny 2023 jylǵy 411 myńnan 2024 jyldyń sońyna qarai 300 myńǵa deiin baiaýlady, bul naryqtyń qanyqtylyǵyn kórsetedi. Qazaqstan qarjygerleri qaýymdastyǵy týra osyndai málimet jariialady.
"Bólshek nesielendirý dinamikalyq ósimdi jalǵastyrýda, bul úi sharýashylyqtary kiristeriniń ósýi jaǵdaiynda qazaqstandyqtardyń tutynýshylyq shyǵyndarynyń joǵarylyǵyn kórsetedi. Máselen, 2024 jyly azamattardyń ataýly aqshalai tabystary 13,3% ósti, bul tutynýshylyq taýarlar men qyzmetterge, onyń ishinde nesiege satyp alynǵan taýarlarǵa suranysty yntalandyrdy", - deidi qaýymdastyq sarapshylary.
Bul rette, ekinshi deńgeili bankter beretin nesieler qurylymynda halyqqa berilgen nesieler barlyq berilgen nesielerdiń 43,6%-yn quraidy, bul is júzinde 2022 jylǵy deńgeige (42,5%) sai keledi.
2024 jyly bólshek portfel ósiminiń jartysynan astamy kepilzatsyz nesieler esebinen (58%) qamtamasyz etildi, olar bólip tóleý josparlarynyń taralýyna bailanysty qatań aqsha-nesie saiasatyna álsiz sezimtal boldy. Odan keiin basqa nesieler (20%) keledi, munda dástúrli túrde negizgi róldi avtokólik nesieleri, ipoteka (19%) jáne jyljymaityn múlikti kepilge alǵan tutynýshylyq nesieler (3%) atqarady.
"Básekelestiktiń kúsheiýi, ekinshi deńgeili bankter men avtosalondar arasyndaǵy seriktestik, óndirýshiler men dilerlerdiń qolaily usynystary jaǵdaiynda sońǵy úsh jyl qatarynan tek avtonesie boiynsha maquldaý úlesi turaqty ósýde (2022 jyly – 11%, 2023 jyly – 16%, 2024 jyly – 17%). Sol siiaqty, 2024 jyly ipotekalyq nesielerdi maquldaý dinamikasy jaqsardy (2023 jyldyń sońyndaǵy 30%-dan 37%-ǵa deiin ósti)".
Ótinimderdi sapaly irikteý merzimi ótken bereshek boiynsha tiimdi áser etedi: 2025 jylǵy 1 qańtardaǵy jaǵdai boiynsha jeke tulǵalarǵa berilgen nesieler boiynsha ol 2,9% deńgeiinde (bir jyl buryn 2,4%), jeke tutynýshylyq nesieler boiynsha – 3,9% (3,2%) jáne ipoteka boiynsha – 0,3% (0,5%).
"Jańa klientterdiń aǵyny 2023 jylǵy 411 myńnan 2024 jyldyń sońyna qarai 300 myńǵa deiin baiaýlady, bul naryqtyń qanyqtylyǵyn kórsetedi. Tiisinshe, nesieleýdiń halyq ishine ený deńgeii burynǵy 86,4% kórsetkishten 88,6%-ǵa deiin ósti", - deidi sarapshylar.
Halyqtyń boryshtyq júktemesi qalypty kúiinde qalyp otyr: qazaqstandyqtardyń jalpy shyǵyndaryndaǵy nesielerdi óteýge jumsalǵan shyǵystardyń úlesi 6,2% (buryn 5,3%), al azyq-túlik ónimderi negizgi úlesti saqtaidy.
