قازاقستاننىڭ بولشەك نەسيەلەندىرۋ نارىعىنداعى بىرنەشە جىل بويعى ءوسىم ءوز اپتىعىن باستى. 2024 جىلدىڭ قورىتىندىسى بويىنشا،جاڭا كليەنتتەر اعىنىنىڭ قارقىنى كۇرت باياۋلاعان، دەپ حابارلايدى Dalanews.kz.
بولشەك نەسيەلەندىرۋ قىزمەتىنە جۇگىنۋدە جاڭا كليەنتتەردىڭ اعىنى 2023 جىلعى 411 مىڭنان 2024 جىلدىڭ سوڭىنا قاراي 300 مىڭعا دەيىن باياۋلادى، بۇل نارىقتىڭ قانىقتىلىعىن كورسەتەدى. قازاقستان قارجىگەرلەرى قاۋىمداستىعى تۋرا وسىنداي مالىمەت جاريالادى.
"بولشەك نەسيەلەندىرۋ ديناميكالىق ءوسىمدى جالعاستىرۋدا، بۇل ءۇي شارۋاشىلىقتارى كىرىستەرىنىڭ ءوسۋى جاعدايىندا قازاقستاندىقتاردىڭ تۇتىنۋشىلىق شىعىندارىنىڭ جوعارىلىعىن كورسەتەدى. ماسەلەن، 2024 جىلى ازاماتتاردىڭ اتاۋلى اقشالاي تابىستارى 13،3% ءوستى، بۇل تۇتىنۋشىلىق تاۋارلار مەن قىزمەتتەرگە، ونىڭ ىشىندە نەسيەگە ساتىپ الىنعان تاۋارلارعا سۇرانىستى ىنتالاندىردى"، - دەيدى قاۋىمداستىق ساراپشىلارى.
بۇل رەتتە، ەكىنشى دەڭگەيلى بانكتەر بەرەتىن نەسيەلەر قۇرىلىمىندا حالىققا بەرىلگەن نەسيەلەر بارلىق بەرىلگەن نەسيەلەردىڭ 43،6%-ىن قۇرايدى، بۇل ءىس جۇزىندە 2022 جىلعى دەڭگەيگە (42،5%) ساي كەلەدى.
2024 جىلى بولشەك پورتفەل ءوسىمىنىڭ جارتىسىنان استامى كەپىلزاتسىز نەسيەلەر ەسەبىنەن (58%) قامتاماسىز ەتىلدى، ولار ءبولىپ تولەۋ جوسپارلارىنىڭ تارالۋىنا بايلانىستى قاتاڭ اقشا-نەسيە ساياساتىنا ءالسىز سەزىمتال بولدى. ودان كەيىن باسقا نەسيەلەر (20%) كەلەدى، مۇندا ءداستۇرلى تۇردە نەگىزگى ءرولدى اۆتوكولىك نەسيەلەرى، يپوتەكا (19%) جانە جىلجىمايتىن مۇلىكتى كەپىلگە العان تۇتىنۋشىلىق نەسيەلەر (3%) اتقارادى.
"باسەكەلەستىكتىڭ كۇشەيۋى، ەكىنشى دەڭگەيلى بانكتەر مەن اۆتوسالوندار اراسىنداعى سەرىكتەستىك، وندىرۋشىلەر مەن ديلەرلەردىڭ قولايلى ۇسىنىستارى جاعدايىندا سوڭعى ءۇش جىل قاتارىنان تەك اۆتونەسيە بويىنشا ماقۇلداۋ ۇلەسى تۇراقتى وسۋدە (2022 جىلى – 11%، 2023 جىلى – 16%، 2024 جىلى – 17%). سول سياقتى، 2024 جىلى يپوتەكالىق نەسيەلەردى ماقۇلداۋ ديناميكاسى جاقساردى (2023 جىلدىڭ سوڭىنداعى 30%-دان 37%-عا دەيىن ءوستى)".
وتىنىمدەردى ساپالى ىرىكتەۋ مەرزىمى وتكەن بەرەشەك بويىنشا ءتيىمدى اسەر ەتەدى: 2025 جىلعى 1 قاڭتارداعى جاعداي بويىنشا جەكە تۇلعالارعا بەرىلگەن نەسيەلەر بويىنشا ول 2،9% دەڭگەيىندە (ءبىر جىل بۇرىن 2،4%)، جەكە تۇتىنۋشىلىق نەسيەلەر بويىنشا – 3،9% (3،2%) جانە يپوتەكا بويىنشا – 0،3% (0،5%).
"جاڭا كليەنتتەردىڭ اعىنى 2023 جىلعى 411 مىڭنان 2024 جىلدىڭ سوڭىنا قاراي 300 مىڭعا دەيىن باياۋلادى، بۇل نارىقتىڭ قانىقتىلىعىن كورسەتەدى. تيىسىنشە، نەسيەلەۋدىڭ حالىق ىشىنە ەنۋ دەڭگەيى بۇرىنعى 86،4% كورسەتكىشتەن 88،6%-عا دەيىن ءوستى"، - دەيدى ساراپشىلار.
حالىقتىڭ بورىشتىق جۇكتەمەسى قالىپتى كۇيىندە قالىپ وتىر: قازاقستاندىقتاردىڭ جالپى شىعىندارىنداعى نەسيەلەردى وتەۋگە جۇمسالعان شىعىستاردىڭ ۇلەسى 6،2% (بۇرىن 5،3%)، ال ازىق-تۇلىك ونىمدەرى نەگىزگى ۇلەستى ساقتايدى.
