Tergeý izoliatorynda otyrǵan Daniiar Álpiev prezident Qasym-Jomart Toqaevqa ashyq hat jazyp, kómek surady. Kásipker hatynda "Altyn orda" bazaryndaǵy bylyqtar týraly aitqan, - dep habarlaidy Dalanews.kz.
Daniiar Álpievtiń hatyn onyń advokaty Dinara Jubatova áleýmettik jelidegi paraqshasynda jariia etti.
Hatta kásipker Astananyń ekonomikalyq tergeý departamentiniń burynǵy qyzmetkerin aiyptap, Toqaevtan "Altyn ordadaǵy" bylyqtarǵa arasha túsýdi suraǵan.
Álpievtiń sózinshe, bilik bazarǵa qatysty qolǵa alǵan sharalarǵa qaramastan "Altyn ordaǵa" qaitadan qaýip tónip tur. Al oǵan, kásipkerdiń sózinshe, Astananyń ekonomikalyq tergeý departamentiniń burynǵy qyzmetkeri Erkebulan Hamzin kináli kórinedi.
"Hamzin ózin elshi Qanysh Izbastinniń nemere inisi dep tanystyryp, maǵan bizdiń otbasymyzdan reiderlik jolmen tartyp alynǵan "Altyn orda" bazaryn qaitarýǵa kómektese alatynyn jetkizdi. Men ákemniń amanatyn aman alyp qalý úshin kelistim", - deidi Álpiev.
Artynsha Hamzin kásipti tartyp alý úshin "tanystaryn" tartqan.
"Qazirgi ýaqytta Hamzin Prezident ákimshiligindegi tanystarynyń atyn jamylyp bazardy bylyqtyryp jatyr. Ol jyl boiy maǵan prezidenttiń otbasynyń kóńili tolmaitynyn aityp, kassany qymbattatý kerek dep buiyrdy. Kassany tek jaldaý aqysyn qymbattatyp qana kóterýge bolady, saldarynan áleýmettik shielenis týady. Sondyqtan olai isteýge bolmaitynyn aittym", - deidi Álpiev.
Hamzin buiyryǵy oryndalmai qalǵannan keiin Hamzin Daniiar Álpiev pen Ermek Marqabaevtyń bedeline nuqsan keltirip, quzyrly organdarǵa bazar qyzmeti týraly durys emes aqparat jibergen. Sondai-aq ol ekeýiniń de uiymdasqan qylmystyq topqa qatysy bar dep aitqan.
"Hamzinniń adamdary bazardy kúshpen basyp alyp, ony basqarýdy óz qoldaryna aldy. Bul derek boiynsha qylmystyq is qozǵalǵan, biraq birneshe kúnnen keiin is jabyldy. Bazardy basyp alýǵa Almaty oblysynyń ishki ister departamenti arnaiy jasaqty jiberip kómektest. Meni bazardan qýyp shyqqannan keiin monopoliia paida bolyp, Bolat Nazarbaevtyń adamdary kele bastady. Hamzin Nazarbaevtyń adamdarymen kelisip alǵan bolýy kerek", - deidi kásipker.
