Biyl kóktemde basy daýǵa qalǵan kompaniia - «TOLAGAI-2050» JShS bas direktorynyń orynbasary Asqar Serdalin kompaniiany Bolat Nazarbaevtyń qyzymen ne bailanystyrǵanyn aityp berdi, - dep habarlaidy Dalanews.kz.
Aita keteiik, sáýirdiń ortasynda 30 myń almatylyqtyń ómirine qaýip tónip turǵany týraly habar taraǵan bolatyn. Tótenshe jaǵdailar ministri Shyńǵys Árinov "Aqsai" basseinindegi sel ustaityn bógetti salý kezinde aqsha jymqyrylǵanyn aitty. Keiinnen bógetti salǵan kompaniia Bolat Nazarbaevtyń qyzy Aqbota Nazarbaevamen bailanysty ekeni belgili boldy.
«TOLAGAI-2050» kompaniiasy sońǵy 5 jylda bógetter men gidrotehnikalyq qurylystardy salýǵa bólingen barlyq qarajattyń úshten ekisin alǵan. Almatydaǵy Aqsai bógetin de osy kompaniia salyp jatyr.
Asqar Serdalin «Golos naroda» basylymyna bergen suhbatynda bóget qurylysynyń toqtap qalýyna onyń sapasynyń qatysy joǵyn aitqan. Kásipkerdiń sózinshe, mańyzdy nysannyń jobalyq-smetalyq qujattamasy ózgertilgen, biraq «Kazselezashita» zańmen belgilengen merzimde bul ózgeristerdi maquldamaǵan bolyp shyqty.
Memlekettik organdar «TOLAGAI-2050» JShS-men jańa kelisimsharttar jasaýyn nege toqtatpaǵan? Bul birneshe jyl buryn kompaniiadaǵy quryltaishylar quramynda Bolat Nazarbaevtyń qyzy Aqbota Nazarbaevanyń bolýymen bailanysty bolýy múmkin be?
Asqar Serdalinniń sózinshe, Aqbota Nazarbaevanyń quryltaishylar quramynda bolýynyń sebebi bólek.
«Nazarbaevtar áýletimen bizdiń kompaniianyń Almaty mańyndaǵy turǵyn úi alabyn salý jobasyna qatysýy týraly naqty kelisim boldy. Biraq joba iske aspai, eki tarap eki jaqqa ketti Nazarbaevtar áýletinen basqa qandai da bir paida taýyp qalý degen bolǵan joq. Ony memlekettik satyp alý boiynsha júrgizilgen statistikalardan-aq bilýge bolady», - deidi Asqar Serdalin.
Kompaniia Almatydaǵy bógetti salýdyń keshigýi qarjylandyrýdyń keshigýimen bailanysty ekenin aitady.
