Petropavl qalasynyń turǵyny, bloger Irina Antonenko jalpyhalyqtyq aza tutý kúni jasaǵan áreketi úshin 10 táýlikke ákimshilik qamaýǵa alyndy. Alǵashynda politsiia eskertý jasaýmen shektelgenimen, qoǵamdaǵy qyzý talqylaýdan keiin is sotqa jetti, dep habarlaidy dalanews.kz.
Qaraly kúni oiyn-saýyq uiymdastyrǵan
El aza tutyp jatqan kúni bloger áleýmettik jelide kóńildi áýen qosyp, bi bilegen tikelei efir ótkizgen. Kórermenderdiń synyna jaýap bergen ol qaza bolǵan adamdardy jeke tanymaitynyn aityp, sol úshin óz josparlaryn ózgertkisi kelmeitinin jetkizgen. Bul málimdeme áleýmettik jeli qoldanýshylarynyń narazylyǵyn kúsheitip, oqiǵa búkil el kóleminde talqylandy.
Oqiǵadan keiin qazaqstandyqtar blogerdiń áreketin qaraly kúnge jáne qaza bolǵandardyń jaqyndaryna qurmetsizdik retinde baǵalap, qatań jaýapkershilikke tartýdy talap etti. Kópshilik Shymkenttegi uqsas jaǵdaidy mysalǵa keltirdi. Buǵan deiin TikTok-taǵy efir kezinde orynsyz áreket jasaǵan 21 jastaǵy Nurahmet Berdibai sot sheshimimen 10 táýlikke qamalyp, efirge qatysqan taǵy eki adam profilaktikalyq esepke alynǵan bolatyn.
Alǵashynda eskertýmen shektelgen
Petropavlda politsiia bastapqyda blogerge resmi eskertý jasap, profilaktikalyq áńgime júrgizýmen ǵana shektelgen. Keiin Antonenko áleýmettik jelide keshirim suraǵan video jariialap, aiyppul tóleýge nemese qamaýǵa alynýǵa daiyn ekenin málimdegen. Alaida oqiǵa qoǵam nazarynan túspei, aqyry sotqa joldandy.
Sot sheshimimen Irina Antonenko 10 táýlikke ákimshilik qamaýǵa alyndy. Osylaisha bloger aldaǵy bir jarym aptany arnaiy qabyldaý ornynda ótkizedi.
Janjaldan keiin Antonenko jumysynan ketkenin de habarlady. Onyń aitýynsha, ol jumystan shyǵý týraly ótinishti bir kún buryn jazǵan. Bloger Petropavldaǵy meditsinalyq mekemelerdiń birinde sanitar bolyp jumys istegen. Oqiǵadan keiin ol qyzmet ornynan ketkenin málimdedi.
