Bolat Nazarbaevtyń enshiles kompanıalaryna tıesili Mańǵystaý oblysynda 239 myń gektar, Jambyl oblysynda 60 myń gektar jer memleket menshigine qaıtarylǵan edi. Degenmen olar qazir kádege asyp jatyr ma? Bul suraqqa resmı organdar jaýap berdi, - dep habarlaıdy Dalanews.kz Massaget.kz-ke siltep.  

2023 jyly májilis depýtaty Erlan Saırov zańsyz alǵan dep tanylǵan Bolat Nazarbaevtyń enshiles kompanıalaryna tıesili Jambyl jáne Mańǵystaý oblysyndaǵy jer memleket menshigine qaıtarylǵanyn habarlaǵan edi. Osy tusta Bolat Nazarbaevtyń enshiles kompanıalaryna tıesili jer sharýalarǵa úlestirildi me degen saýal týyndady.

Jer resýrstaryn basqarý departamentiniń jaýaby:

Saýalǵa Jambyl oblysynyń jer resýrstaryn basqarý departamenti jaýap bergen. Departament óńirde biraz jer jekeniń qolyna ótip ketkendikten osyndaı másele týyndap otyrǵanyn jetkizdi. Sol sebepti qazir paıdalanylmaı jatqan alqaptardy qaıtarý jumystary qyzý júrgizilip jatyr eken.

"Prezıdent tapsyrmasy aıasynda oblysta 2022 jyly 202, 7 myń ga, 2023 jyly 201,2 myń ga jer memleket ıeligine qaıtarylsa, aǵymdaǵy jyldyń 1 tamyzynda memleket menshigine qaıtarylǵan jerdiń alańy - 77,2 myń gektar. Bıylǵy jospar 80 myń gektar jerdi qaıtarý", - delingen habarlamada.

Bolat Nazarbaevtan qaıtqan jer taǵdyry:

Al Bolat Nazarbaevtyń enshiles kompanıalarynan qaıtarylǵan 60,0 myń ga jer "BN-Ekotehnologıa" JSHS-na tıesili bolǵan eken. Kompanıa Sarysý aýdanynyń Qamqaly aýyldyq okrýgi aýmaǵyndaǵy jer qorynan alańy 60 000 ga jaıylym jer ýchaskesine taýarly aýyl sharýashylyǵy óndirisin júrgizý úshin 49 jylǵa óteýli jer paıdalaný quqyǵyn alypty. Jer paıdalaný quqyǵy 2006 jyldyń 18 shildesinde Sarysý ákimdiginiń 166 qaýlysymen zańdastyrylǵan. Dese de, seriktestik jaıylym jerine quqyq tapsyrǵan 2006 jyldan beri paıdalanbaı kelgen.

"Osyǵan oraı jer paıdalanýshymen departament pen Sarysý aýdany ákimdiginiń jer qatynastary bólimi ókilderiniń tikeleı kezdesýi arqyly júrgizgen túsindirme jumysynan keıin jer paıdalanýshy jerdi memleket menshigine óz erkimen notarıýspen bekitilgen ótinishi negizinde qaıtarǵan. Memleket menshigine qaıtarylǵandyǵy týraly aýdan ákimdiginiń qaýlysy qabyldanǵan. Sarysý aýdany jer qatynastarynyń málimetine sáıkes, búgingi kúnge deıin atalǵan jer ýchaskesine quqyq tapsyrylmaǵandyqtan, jer tolyǵymen memleket jer qorynyń esebinde turǵandyǵyn habarlaımyz", - delingen habarlamada.

Eske salaıyq, buǵan deıin eks-prezıdent Nursultan Nazarbaevtyń inisi Bolat Nazarbaev qaıtys bolǵannan keıin onyń múlkin bólý prosesi bastalǵanyn habarlaǵan edik.

bes.media derekterine súıensek, Bolat Nazarbaev qaıtys bolǵannan keıin notarıýs  2024 jylǵy 3 qańtarda muragerlik boıynsha isti ashty.

"Nazarbaevtyń otbasy músheleri, sonyń ishinde uly Nurbol, jubaıy Dınara jáne birneshe balasy muragerlik quqyǵy týraly ótinish bildirdi. Ótinishter birlesip satyp alynǵan múliktiń úlesine de, zań boıynsha muranyń mindetti úlesine de qatysty", - dep jazylǵan málimette.

Muragerlik quqyǵy týraly ótinishpen Nurbol Bolatuly Nazarbaev (1983 jyly 14 qarashada týǵan, mura qaldyrýshynyń uly), Nazarbaeva Dınara Kemelhanova (1986 jyly 4 jeltoqsanda týǵan, mura qaldyrýshynyń jubaıy) júgingen. 

Zań boıynsha muranyń mindetti úlesin alýǵa ótinish bildirgen Bolat Nazarbaevtyń balalary:

• Bolatuly Bolathan, 2012 jyly 7 aqpanda dúnıege kelgen.
• Nazarbaev Muhammed Bolatuly, 2021 jyly 21 qyrkúıekte dúnıege kelgen.
• Nazarbaeva Erkejan Bolatqyzy, 2018 jyly 18 mamyrda dúnıege kelgen.
• Nazarbaev Elnur Bolatovıch, 2013 jyly 19 tamyzda dúnıege kelgen.
• Nazarbaev Bolat Bolatovıch, 2014 jyly 17 qazanda dúnıege kelgen.
• Nazarbaev Akbar Bolatovıch, 2016 jyly 23 qarashada dúnıege kelgen.
• Nazarbaeva Nurbaný Bolatqyzy, 2018 jyly 9 shildede dúnıege kelgen.
• Bolatqyzy Tomırıs, 2013 jyly 30 shildede dúnıege kelgen.
• Bolatqyzy Arýnaz, 2016 jyly 30 qańtarda dúnıege kelgen.
• Nazarbaev Hanbolat Bolatuly, 2002 jyly 17 aqpanda dúnıege kelgen.
• Nazarbaeva Albına Bolatqyzy, 2003 jyly 7 maýsymda dúnıege kelgen.
• Nazarbaev Hantóre Bolatuly, 2018 jyly 26 qańtarda dúnıege kelgen.
• Nazarbaeva Janel Bolatovna, 2010 jyly 3 qarashada dúnıege kelgen.

Bolat Nazarbaevtyń múlkin bólý muragerlik týraly is qaralǵansha ýaqyt alady.