– 1991 jyly Qazaqstan óziniń táýelsizdigine ie boldy. Al 1992 jyly kúnkóris qiyndap, ailyq keshige bastady. Sol kezde oblys ortalyǵyndaǵy páterlerdiń quny 100 dollarǵa deiin quldyraǵan edi. Jurtta aqsha bolmady. Biraq sol qysqa ýaqytta Bolat Ábilovtyń biznespen ainalysyp, qalai dáýletti adamǵa ainalǵanyn túsine almadyq, – deidi jýrnalist.
Iá, 1992 jyly Bolat Ábilov Nazarbaevtyń qalamsabyn qalai satyp alǵanyn Forbes.kz basylymyna qýana áńgimelep bergen-di.
1992 jyly «Bóbek» qorynyń prezidenti Sara Nazarbaeva kómekke muqtaj balalarǵa qajetti qarjy jinaý maqsatynda qaiyrymdylyq telemarafonyn uiymdastyrǵan-dy.
Telemarafon kezinde uiymdastyrylǵan aýktsionda Roza Baǵlanovanyń shai ishýge arnalǵan ydystary, Bibigúl Tólegenova men Ermek Serkebaevtyń kiimderi jáne Qazaqstan BUU músheligine qabyldanǵanda Nursultan Nazarbaevtyń osynaý qujatqa qol qoiǵan qalamsaby bás saýdaǵa shyǵarylǵan bolatyn.
– Men bás saýdaǵa shyǵarylǵan Nazarbaevtyń qalamsabyn qalai bolǵanda da satyp alýym kerek ekenin túsindim. Birinshi kezekte prezidentimizge qazaq kásipkeri retinde qoldaý kórsetkendi jón sanadym. Ekinshiden, bás saýdaǵa sol kezde kóptegen sheteldik kompaniialar qatysyp, olar da qalamsapqa kóz tigip otyrdy. Prezidenttiń qalamsabyn ózge eldiń kásipkerleri satyp alyp, bóten elge alyp ketkenin qalamadym.
Úshinshiden, aýktsion ótken zalda atyshýly banditter otyrǵan edi. Óz basym Prezidenttiń qalamsabyn qylmystyq toptyń serkeleri satyp alǵanyn qalamadym.
Tórtinshiden, prezidenttiń qalamsabyn satyp alǵan kúnniń ertesinde elimizge tanymal azamattardyń biri bolyp oianatynymdy túsindim. Osylaisha men prezidenttiń qalamsabyn satyp aldym.
Osydan keiin meni Nursultan Nazarbaevtyń kúzeti shaqyryp alyp, tanysty. Nazarbaevpen tanystyǵym osylaisha bastaldy. Álgi qalamsappen Nursultan Ábishuly aq qaǵazǵa «16 qazan 1992 jyl» dep jazyp, estelik úshin qol qoiyp berdi, – dep Bolat Ábilov Forbes.kz basylymyna áńgimelep bergen bolatyn.
