– 1991 جىلى قازاقستان ءوزىنىڭ تاۋەلسىزدىگىنە يە بولدى. ال 1992 جىلى كۇنكورىس قيىنداپ، ايلىق كەشىگە باستادى. سول كەزدە وبلىس ورتالىعىنداعى پاتەرلەردىڭ قۇنى 100 دوللارعا دەيىن قۇلدىراعان ەدى. جۇرتتا اقشا بولمادى. ءبىراق سول قىسقا ۋاقىتتا بولات ءابىلوۆتىڭ بيزنەسپەن اينالىسىپ، قالاي داۋلەتتى ادامعا اينالعانىن تۇسىنە المادىق، – دەيدى جۋرناليست.
ءيا، 1992 جىلى بولات ءابىلوۆ نازاربايەۆتىڭ قالامسابىن قالاي ساتىپ العانىن Forbes.kz باسىلىمىنا قۋانا اڭگىمەلەپ بەرگەن-دى.
1992 جىلى «بوبەك» قورىنىڭ پرەزيدەنتى سارا نازاربايەۆا كومەككە مۇقتاج بالالارعا قاجەتتى قارجى جيناۋ ماقساتىندا قايىرىمدىلىق تەلەمارافونىن ۇيىمداستىرعان-دى.
تەلەمارافون كەزىندە ۇيىمداستىرىلعان اۋكسيوندا روزا باعلانوۆانىڭ شاي ىشۋگە ارنالعان ىدىستارى، بيبىگۇل تولەگەنوۆا مەن ەرمەك سەركەبايەۆتىڭ كيىمدەرى جانە قازاقستان بۇۇ مۇشەلىگىنە قابىلدانعاندا نۇرسۇلتان نازاربايەۆتىڭ وسىناۋ قۇجاتقا قول قويعان قالامسابى ءباس ساۋداعا شىعارىلعان بولاتىن.
– مەن ءباس ساۋداعا شىعارىلعان نازاربايەۆتىڭ قالامسابىن قالاي بولعاندا دا ساتىپ الۋىم كەرەك ەكەنىن ءتۇسىندىم. ءبىرىنشى كەزەكتە پرەزيدەنتىمىزگە قازاق كاسىپكەرى رەتىندە قولداۋ كورسەتكەندى ءجون سانادىم. ەكىنشىدەن، ءباس ساۋداعا سول كەزدە كوپتەگەن شەتەلدىك كومپانيالار قاتىسىپ، ولار دا قالامساپقا كوز تىگىپ وتىردى. پرەزيدەنتتىڭ قالامسابىن وزگە ەلدىڭ كاسىپكەرلەرى ساتىپ الىپ، بوتەن ەلگە الىپ كەتكەنىن قالامادىم.
ۇشىنشىدەن، اۋكسيون وتكەن زالدا اتىشۋلى بانديتتەر وتىرعان ەدى. ءوز باسىم پرەزيدەنتتىڭ قالامسابىن قىلمىستىق توپتىڭ سەركەلەرى ساتىپ العانىن قالامادىم.
تورتىنشىدەن، پرەزيدەنتتىڭ قالامسابىن ساتىپ العان كۇننىڭ ەرتەسىندە ەلىمىزگە تانىمال ازاماتتاردىڭ ءبىرى بولىپ وياناتىنىمدى ءتۇسىندىم. وسىلايشا مەن پرەزيدەنتتىڭ قالامسابىن ساتىپ الدىم.
وسىدان كەيىن مەنى نۇرسۇلتان نازاربايەۆتىڭ كۇزەتى شاقىرىپ الىپ، تانىستى. نازاربايەۆپەن تانىستىعىم وسىلايشا باستالدى. الگى قالامساپپەن نۇرسۇلتان ءابىش ۇلى اق قاعازعا «16 قازان 1992 جىل» دەپ جازىپ، ەستەلىك ءۇشىن قول قويىپ بەردى، – دەپ بولات ءابىلوۆ Forbes.kz باسىلىمىنا اڭگىمەلەپ بەرگەن بولاتىن.
