Aimaq basshysynyń Teńge aýylynyń turǵyndarymen kezdesýinde aýyl ákimi Sársenbek Qalaýbaev jyl boiy atqarylǵan jumystar týraly esep berip, 2022 jylǵa arnalǵan josparlarymen bólisti. Óz kezeginde oblys ákimi Nurlan Noǵaev jinalǵandardy óńirde júrgizilip jatqan jumystar týraly habardar etip, suraqtaryna jaýap berdi, usynystaryn tyńdady.
Kezdesýde halyq áleýmettik sala, jumyspen qamtý, mal sharýashylyǵy, jer telimderin alý, kóshelerge asfalt salý, densaýlyq saqtaý jáne kommýnaldyq qyzmetterdiń quny máselelerin kóterdi.
Óńir basshysy barlyq aitylǵan máseleler mańyzdylyǵyna qarai júieli túrde sheshiletinin atap ótti. Sondai-aq, ata-analardy bolashaqta balalaryn
suranysqa ie mamandyqtardy tańdaýyna kómektesýge shaqyrdy.
– Biz qazirgi ýaqytta bolashaqty munai-gaz salasymen ǵana bailanystyrý durys emes ekenin túsinýimiz kerek. Perspektivaly salalar bar. Ol aýyl sharýashylyǵy, teńiz isi, IT mamany. Óskeleń urpaqqa munai salasynan bólek jeke áleýeti men darynyn ashýyna múmkindik berýimiz kerek. Sonda ǵana bizdiń balalar básekege qabiletti bolady, – dedi Nurlan Noǵaev.
Budan keiin Nurlan Noǵaev Rahat aýylynyń turǵyndarymen kezdesip, aýyl ákimi Óserbai Tabynshaevtyń jyldyq esebin tyńdady. Rahat aýylynyń turǵyndary aýyz sý, jumyspen qamtý, aýyldy abattandyrý jáne kógaldandyrý máselelerin kóterdi. Óz kezeginde óńir basshysy Nurlan Noǵaev jinalǵandardy oblysta júrgizilip jatqan jumystar týraly habardar etip, olardyń suraqtaryna jaýap berdi.
Esep berý kezdesýlerinen keiin oblys ákimi Teńge jáne Rahat aýyldarynda azamattardy jeke máselelerimen qabyldady.
Búginde Rahat aýylynyń 42 myńnan astam turǵyny bar. "Rahat", "Aqsý", "Merei" shaǵyn aýdandarynda 7 630 turǵyn úi tirkelgen.
Aýylda 3 orta mektep, 1 memlekettik jáne 7 jekemenshik balabaqsha jumys isteidi.
Osy jyly «Rahat» shaǵynaýdany Balaýsa, Gúlder jáne Jemisti kóshelerine jalpy uzyndyǵy 3,6 shaqyrym bolatyn avtokólik joldarynyń qurylysyn júrgizý qaralǵan.
