Olimpiadalardyń tarihyna kóz salsaq, AQSh quramasy bokstan beiresmi esepte 6 ret top bastaǵan. Árine, 1904 jylǵy Sent-Lýis olimpiadasyn sanattan shyǵaryp tastaýǵa bolady. Bul dodaǵa tek AQSh boksshylary qatysyp, altyndy da, kúmisti de, qolany da ózderi bólisti (7 altyn, 7 kúmis, 5 qola).
Kýba quramasy da 6 ret kóshbasshy boldy. Bostandyq aralynyń sheberleri 1972 jylǵy Miýnhen olimpiadasynda 3 altyn, 1 kúmis, 1 qola medal jeńip alyp, alǵash ret top bastady. 1980 jylǵy Máskeý olimpiadasynda kýbalyqtar 6 altyn ielenip ketti. Sharshy alań ieleriniń jalǵyz altyny — «qyrǵi qabaq soǵys» dáýirindegi KSRO basshylarynyń tym meiriimdiligi bolar, kim bilsin… Esesine, 1984 jyly Los-Anjeleste ótken olimpiadada AQSh KSRO siiaqty «jalǵan meiirim» tanytyp áýre bolmady, olar 9 altyn, 1 kúmis, 1 qola ielenip, olimpiadalardaǵy boks júldesinen rekord jasady.
Bokstan aiǵa qol sozyp júrmese de, óz elinde ótken olimpiadadalarda ózgelerden qara úzip ketken elder de barshylyq. Sportqa saiasat aralaspaidy degenniń beker áńgime ekenine osydan kóz jetkizsek kerek. Mysaly, 1908 jylǵy jáne 2012 jylǵy London olimpiadalarynda Ulybritaniia kósh bastady. 1936 jyly Berlinde Germaniia (2-2-1) kósh bastamasa, fiýrer úshin ólim bolar ma edi? 1960 jyly Rimde Italiia 7 júldemen (3-3-1) qara úzip ketti.
Sondyqtan Ózbekstan quramasynyń bul tabysyna baýyrlas el retinde qýanysh bildire otyryp, olardyń jetistigi turaqty kóriniske ainalýyn kútemiz. Ózbekter Kýba men AQSh siiaqty komandalyq beiresmi esepte 6 olimpiadada top jaryp jatsa, tipti biylǵy tabysyn Tokioda qaitalap jatsa, tamasha dástúr qalyptastyra alǵany.
Qazaqstan quramasy ózi qatysqan 6 olimpiadada bokstan 3 ret (Atlanta, Sidnei, Afina) úzdik úshtikke endi, Beijińde — 7, Londonda 5 oryn aldy. Biyl otandastarymyz 1 altyn, 2 kúmis, 2 qola júldemen úzdik tórttikti túiindep otyr. Bul jaman nátije emes. Eń bastysy, turaqtylyq bar.
Olimpiadalar tarihynda bokstan AQSh quramasy kóshbasshy. Olar 50 altyn, 24 kúmis, 40 qola, barlyǵy 114 júldemen kósh basynda tur.
2. Kýba — 37, 19, 17 = 73
3. Ulybritaniia — 18, 13, 25 = 56
Qazaqstan bar-joǵy 6 olimpiadaǵa qatyssa da, bul mártebeli tizimde 7 altyn, 7 kúmis, 8 qola, barlyǵy 22 júldemen 10 orynda keledi. Bul kórsetkish aldaǵy Tokio olimpiadasynda jaqsara túsetini anyq. Óitkeni, 9 oryndaǵy Argentinanyń 7, 7, 10, barlyǵy 24 júldesi bar. Al sońǵy jyldary áýesqoi boksta Argentina burynǵy pozitsiiasynan kóp sheginip ketti. Ózbekstan quramasy 4 altyn, 2 kúmis, 8 qola, barlyǵy 14 júldemen 17 orynda tur.
Derekkóz: http://statsport.kz/
Esei Jeńisuly
