وليمپيادالاردىڭ تاريحىنا كوز سالساق، اقش قۇراماسى بوكستان بەيرەسمي ەسەپتە 6 رەت توپ باستاعان. ارينە، 1904 جىلعى سەنت-لۋيس وليمپياداسىن ساناتتان شىعارىپ تاستاۋعا بولادى. بۇل دوداعا تەك اقش بوكسشىلارى قاتىسىپ، التىندى دا، كۇمىستى دە، قولانى دا وزدەرى ءبولىستى (7 التىن، 7 كۇمىس، 5 قولا).
كۋبا قۇراماسى دا 6 رەت كوشباسشى بولدى. بوستاندىق ارالىنىڭ شەبەرلەرى 1972 جىلعى ميۋنحەن وليمپياداسىندا 3 التىن، 1 كۇمىس، 1 قولا مەدال جەڭىپ الىپ، العاش رەت توپ باستادى. 1980 جىلعى ماسكەۋ وليمپياداسىندا كۋبالىقتار 6 التىن يەلەنىپ كەتتى. شارشى الاڭ يەلەرىنىڭ جالعىز التىنى — «قىرعي قاباق سوعىس» داۋىرىندەگى كسرو باسشىلارىنىڭ تىم مەيرىىمدىلىگى بولار، كىم ءبىلسىن… ەسەسىنە، 1984 جىلى لوس-انجەلەستە وتكەن وليمپيادادا اقش كسرو سياقتى «جالعان مەيىرىم» تانىتىپ اۋرە بولمادى، ولار 9 التىن، 1 كۇمىس، 1 قولا يەلەنىپ، وليمپيادالارداعى بوكس جۇلدەسىنەن رەكورد جاسادى.
بوكستان ايعا قول سوزىپ جۇرمەسە دە، ءوز ەلىندە وتكەن وليمپيادادالاردا وزگەلەردەن قارا ءۇزىپ كەتكەن ەلدەر دە بارشىلىق. سپورتقا ساياسات ارالاسپايدى دەگەننىڭ بەكەر اڭگىمە ەكەنىنە وسىدان كوز جەتكىزسەك كەرەك. مىسالى، 1908 جىلعى جانە 2012 جىلعى لوندون وليمپيادالارىندا ۇلىبريتانيا كوش باستادى. 1936 جىلى بەرليندە گەرمانيا (2-2-1) كوش باستاماسا، فيۋرەر ءۇشىن ءولىم بولار ما ەدى؟ 1960 جىلى ريمدە يتاليا 7 جۇلدەمەن (3-3-1) قارا ءۇزىپ كەتتى.
سوندىقتان وزبەكستان قۇراماسىنىڭ بۇل تابىسىنا باۋىرلاس ەل رەتىندە قۋانىش بىلدىرە وتىرىپ، ولاردىڭ جەتىستىگى تۇراقتى كورىنىسكە اينالۋىن كۇتەمىز. وزبەكتەر كۋبا مەن اقش سياقتى كوماندالىق بەيرەسمي ەسەپتە 6 وليمپيادادا توپ جارىپ جاتسا، ءتىپتى بيىلعى تابىسىن توكيودا قايتالاپ جاتسا، تاماشا ءداستۇر قالىپتاستىرا العانى.
قازاقستان قۇراماسى ءوزى قاتىسقان 6 وليمپيادادا بوكستان 3 رەت (اتلانتا، سيدنەي، افينا) ۇزدىك ۇشتىككە ەندى، بەيجىڭدە — 7، لوندوندا 5 ورىن الدى. بيىل وتانداستارىمىز 1 التىن، 2 كۇمىس، 2 قولا جۇلدەمەن ۇزدىك تورتتىكتى تۇيىندەپ وتىر. بۇل جامان ناتيجە ەمەس. ەڭ باستىسى، تۇراقتىلىق بار.
وليمپيادالار تاريحىندا بوكستان اقش قۇراماسى كوشباسشى. ولار 50 التىن، 24 كۇمىس، 40 قولا، بارلىعى 114 جۇلدەمەن كوش باسىندا تۇر.
2. كۋبا — 37، 19، 17 = 73
3. ۇلىبريتانيا — 18، 13، 25 = 56
قازاقستان بار-جوعى 6 وليمپياداعا قاتىسسا دا، بۇل مارتەبەلى تىزىمدە 7 التىن، 7 كۇمىس، 8 قولا، بارلىعى 22 جۇلدەمەن 10 ورىندا كەلەدى. بۇل كورسەتكىش الداعى توكيو وليمپياداسىندا جاقسارا تۇسەتىنى انىق. ويتكەنى، 9 ورىنداعى ارگەنتينانىڭ 7، 7، 10، بارلىعى 24 جۇلدەسى بار. ال سوڭعى جىلدارى اۋەسقوي بوكستا ارگەنتينا بۇرىنعى پوزيسياسىنان كوپ شەگىنىپ كەتتى. وزبەكستان قۇراماسى 4 التىن، 2 كۇمىس، 8 قولا، بارلىعى 14 جۇلدەمەن 17 ورىندا تۇر.
دەرەككوز: http://statsport.kz/
ەسەي جەڭىس ۇلى
