Eýropalyq odaqqa múshe elder ekinshi sanktsiialardyń mehanizmin quryp jatyr. Onda Reseige shekteýlerden ainalyp ótýge kómektesip jatqan elderge sanktsiia engizbek.
Bul mehanizm qurylsa, birinshi kezekte Ortalyq Aziia elderi "qara tizimge" enbek. Osylai dep Bloomberg agenttigi derekkózine súienip habarlaidy.
"Bul instrýmenttiń negizgi maqsaty úshinshi elder arqyly shekteýlerden ainalyp ótip otyrǵan Reseige tosqaýyl qoiý. Eger bul jumys istemese, onda úshinshi elderge tolyq shekteý qoiylady", - dep habarlaidy Bloomberg.
Agenttik habarlaǵandai, 2022 jyly Reseige qanshama sanktsiia salynǵanymen bul elde importtyń óskeni baiqalǵan. Atap aitqanda shetel taýarlary Qazaqstan, Birikken Arab ámirligi, Túrkiia, Qytai jáne basqa da elder arqyly Reseige jetkizilip otyrǵan.
Bul másele 19-21 mamyr aralyǵynda Japoniiada ótetin "Úlken jetilik" sammitinde qaralmaq.
Agenttiktiń jazýynsha, eger joba maquldansa, jaqyn arada bul sanktsiialar eń birinshi Ortalyq Aziiaǵa, onyń ishinde Qazaqstanǵa áser etýi múmkin.
Byltyr Qazaqstannan Reseige mikrochipter tasymaldaý 300 esege artqan.
Resmi málimet boiynsha, Eýropa elderinen Qazaqstanǵa import 2 mlrd dollarǵa ósip, 8 mlrd dollarǵa jetken. Al Qazaqstannan Reseige taýar tasymaldaý 25 paiyzǵa ósken.
Biyl sáýir aiynda EO, Ulybritaniia jáne AQSh ókilderi Qazaqstanǵa baryp, sanktsiia salý múmkindigin eskertken.
Qazaqstan biligi Reseige sanktsiiadan ainalyp ótýge kómektesip jatqanyn birneshe ret teriske shyǵardy.
