Ózbekstan azamaty, «Maha.dxb» búrkenshik atymen tanymal bloger Mahmýd Ýmidovich Hikmatovqa halyqaralyq izdeý jariialandy, dep habarlaidy dalanews.kz.
Qarjylyq monitoring agenttiginiń málimetinshe, 2000 jylǵy 19 aqpanda týǵan Hikmatov «SultanGames», «PINCO», «Nomadcasino», «Pin-Up», «Vavada» jáne basqa da zańsyz internet-kazinolardy jarnamalap, nasihattady degen kúdikke ilingen. Sot oǵan qamaýda ustaý túrindegi bultartpas sharasyn sanktsiialaǵan.
QMA málimetinshe, Qazaqstan aýmaǵynda internet-kazinolardyń zańsyz qyzmetine jaǵdai jasaityn turaqty júie jumys istegen. Onyń aiasynda internet-kazino interfeisi usynylyp, aqsha qabyldaý jáne tólem jasaý jolǵa qoiylǵan. Bul rette ekvairing, mobildi tólemder men kriptovaliýta paidalanylǵan. Sonymen qatar el azamattaryn qumar oiyndarǵa kóptep tartý úshin jarnamalyq materialdar taratylǵan.
Zańsyz internet-kazinolardy jarnamalaý úshin uiymdastyrýshylar Hikmatovty tartqan. QMA málimetinshe, oǵan Qazaqstanda jumys isteitin infliýenserlerdi taýyp, solar arqyly jarnamalyq materialdardy jariialaýdy uiymdastyrý mindeti júktelgen.
Osy maqsatta Hikmatov blogerlerden áleýmettik jelilerdegi paraqshalarynyń statistikasyn, onyń ishinde jazylýshylarynyń demografiialyq jáne geografiialyq kórsetkishterin, sondai-aq jariialanymdarynyń aýditoriiany qamtý kórsetkishterin suratqan. Jarnama quny osy málimetterge bailanysty belgilengen.
QMA málimetinshe, Hikmatov barlyǵy 35-ten astam blogerdi, onyń ishinde bloger Qamza Q.-ny tartqan.
Agenttik málimetinshe, aýditoriiasy aýqymdy Qamza Q. internet-kazinolarǵa aparatyn referaldyq siltemelerdi jariialap, Qazaqstan azamattaryn tyiym salynǵan qumar oiyndarǵa tartqan. Ol paidalanýshylardyń árbir siltemege ótýi úshin syiaqy alyp otyrǵan.
QMA buǵan deiin Qamza Q.-nyń 6 tamyzda Vetnamnan Qazaqstanǵa ekstraditsiialanǵanyn habarlaǵan.
Qarjylyq monitoring agenttigi izdeýdegi Mahmýd Hikmatovtyń qaida júrgeni týraly aqparat biletin azamattardy vedomstvoǵa habarlasýǵa shaqyrdy.
