Qarjylyq monitoring agenttigi «Biryńǵai jinaqtaýshy zeinetaqy qory» AQ-dan azamattardyń jinaqtaryn zańsyz shyǵarý derekteri boiynsha stomatologiialyq klinikalardyń basshylary men ózge de adamdarǵa qatysty tergep-tekserýdi jalǵastyrýda, dep habarlaidy Dalanews.kz.
Zeinetaqy jinaqtary stomatologiialyq qyzmetter kórsetý týraly formaldy sharttar jasasý jáne keiinnen jalǵan meditsinalyq qujattar usyný arqyly shyǵarylǵanyn eske salamyz.
Atalǵan kómek úshin kúdiktiler alynǵan qarajattyń 10%-dan 20%-ǵa deiingi mólsherinde zańsyz syiaqy ustap otyrǵan.
Qylmystyq shemaǵa 42 stomatologiialyq klinika tartylǵan.
Jalpy somasy 200 mlrd teńgeden astam qarajat shyǵarylǵan.
Qylmystyq jolmen alynǵan tabystarǵa kúdiktiler elitalyq jyljymaly jáne jyljymaityn múlik satyp alyp, sondai-aq jasyrý maqsatynda úshinshi tulǵalardyń atyna rásimdep, jańa stomatologiialyq klinikalar ashqan.
On bir kúdikti 2 ai merzimge qamaýǵa alyndy, al úsheýine qatysty úiqamaq túrindegi bultartpaý sharasy tańdaldy.
Sonymen qatar, júieli túrde zańsyz syiaqy alý úshin meditsinalyq mekemelerdiń dárigerleri dárigerlik-konsýltatsiialyq komissiialardyń (DKK) jalǵan qorytyndylaryn bergen, kúdiktilerden alynǵan qarajattyń jalpy somasy 30 mln teńgeni qurady.
Atalǵan faktiler boiynsha birqatar sotqa deiingi tergep-tekserýler bastaldy.
Buǵan deiin habarlanǵandai, óz zeinetaqy aýdarymdaryn alǵan azamattar qylmystyq qýdalaý aiasyna túspeidi.
Qazaqstan Respýblikasy Qylmystyq-protsestik kodeksiniń 201-babyna sáikes ózge aqparat jariia etýge jatpaidy.
