24-30 qarashasy aralyǵynda Almaty mádeniet pen kino óneriniń ortalyǵyna ainalady. Jyldyń eń mańyzdy mádeni sharalarynyń biri – XVII Halyqaralyq «Eýraziia» kinofestivali óz shymyldyǵy qazaqstandyq «Bizge dáriger kerek» filminiń kórsetilimimen ashylady, – dep habarlaidy Dalanews.kz.
Bul otbasyǵa arnalǵan týyndy adamgershilik, kásibi sheberlik jáne ómirde oryn alatyn kútpegen oqiǵalar jaily syr shertedi. Ol kórermenderdi tereń sezim, áserli ázil jáne ómirlik filosofiiaǵa toly erekshe álemge jeteleidi. Kartina siýjeti Almatydaǵy aýrýhanalardyń birinde órbidi. Onda bilikti dáriger Nikolai Anatolevich Grachevtiń 70 jyldyq mereitoiy toilanbaq. Týǵan kún saltanatty túrde bastalǵanymen, oqiǵa kútpegen arnaǵa túsip,
adamdar arasyndaǵy shynaiy qarym-qatynastardy ashady.
Kórermender úshin «Bizge dáriger kerek» filmi tek oqiǵa jelisin ǵana emes, sonymen qatar dárigerlerdiń adal eńbegin, ómirlik qundylyqtar men úmitke toly tereń emotsiialardy jetkizedi. Atalmysh film «Eýraziia» kinofestivaliniń airyqsha týyndysy bolmaq.
– Bul mýzykalyq komediia brodveilik stildegi miýzikl janrynda túsirilgen. Biz tek án aitýmen shektelmeimiz. Árbir án siýjettiń órbýine úles qosady. Osyndai filmdi Qazaqstanda buryn-sońdy kórgen emespin», – deidi film rejisseri Ravil Trýmov.
Bul týyndy qazaqstandyq kino sheberleriniń nátijeli jumysynyń jemisi. Filmniń stsenariin Asqar Bisembin, Sáken Toqtaǵulov, Meiirman Ábdiraimov jáne Ravil Trýmov jazǵan.
Kompozitor Aleksei Maklaidyń mýzykasy oqiǵalardyń shynaiylyǵyn áserli etip, árkimniń sezimin terbetedi. Qoiýshy operatorlar Evgenii Mahmetov pen Qazbek Ámirjanovtyń sheberligi ár kórinisti kórkemdei tústi.
Kórermender filmdegi keiipkerlerdiń jan dúniesimen akterlerdiń shynaiy oiyny arqyly tanysady. Ásirese, Serik Shárip pen Qaraqat Bashanova óz rólderin sheberlikpen somdap, filmge erekshe jylýlyq syilady. Akterlik ansambl qazaqstandyq kinematograftyń joǵary deńgeiin kezekti ret dáleldeidi.
Dástúrli festivaldiń negizin qalaýshy jáne uiymdastyrýshy – QR Mádeniet jáne aqparat ministrligi. Kinofestivaldi tikelei uiymdastyrý Sháken Aimanov atyndaǵy «Qazaqfilm» ulttyq kinostýdiiasyna júktelgen.
