Ulttyq quryltai barysynda Memleket basshysy Qasym-Jomart Toqaev tarihi oqiǵalardy tizbelep, daý qýatyndardy synǵa aldy, dep habarlaidy Dalanews.kz.
"Qazir ertede ótken oqiǵalarǵa, belgili bir tulǵalarǵa qatysty talqylaý kóbeiip barady. Qalamgerlerimiz, tipti, Shyńǵys hannyń tegi kim dep, aitysyp-tartysyp jatatyn boldy. Keńes zamanyndaǵy tulǵalardy, ásirese, Alash kósemderi men Keńes qairatkerlerin salystyryp, bir-birine qarsy qoiady", - dedi Prezident.
Onyń paiymynsha, dál osyndai sóz tartystarynyń aqiqatyna jetý qiyn, jetkenniń ózinde el ishine iritki salatyn mundai daý-damaidyń esh qajeti joq.
"Ashyǵyn aitýymyz kerek, biz tarihqa kelgende kóbinese emotsiiaǵa berilip ketemiz. Ótken zamandy orynsyz qazbalaý jaqsylyq ákelmeidi, onyń paidasynan góri, ziiany kóp", - dedi Prezident basqosýda.
Ol «Óspeitin eldiń balasy ónbeitin daýdy qýady» dep beker aitylmaǵanyn eske saldy.
"Ótken is ótti, endi ony eshkim ózgerte almaidy. Ýaqyt eń ádil tóreshi ekenin umytpaiyq. Bizge bitpeitin daý-damai emes, myzǵymas yntymaq pen birlik kerek. Qazirgi tarihi kezeńde halqymyzdyń sózi de, isi de – bir bolýy qajet. Sondyqtan ziialy qaýym, eń aldymen, elimizdiń birligin nyǵaitýǵa basa nazar aýdarǵany jón. Aǵa býyn jas urpaqqa jol nusqap, baǵyt-baǵdar berýi kerek", - dedi sodan soń.
