Astanada V Dúniejúzilik kóshpendiler oiyndary ótti. Dúbirli synǵa álemniń 89 elinen 2500-ge jýyq sportshy qatysty. Aitýly básekede Qazaqstan quramasynyń sportshylary 43 altyn, 32 kúmis jáne 37 qola júlde enshiledi. Ortaq jeńiske Túrkistan oblysynan barǵan 32 sportshy da úles qosty. Óńir sportshylary 16 altyn, 10 kúmis, 5 qola júldeni ielenip, respýblikada ózderiniń úzdik ekenderin dáleldedi. Búgin Túrkistan oblysynyń ákimi Darhan Satybaldy Kóshpendiler oiyndarynyń jeńimpazdary men júldegerlerin qabyldap, qurmet kórsetti, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Qazaq elindegi dúbirli doda joǵary deńgeide uiymdastyryldy. Halqymyzdyń ǵana emes, kóshpendilerdiń tarihy, mádenieti, sporty tanystyrylyp, abyroiymyz aspandady. Túrkistan oblysynyń sportshylary óte tabysty óner kórsetip, júlde sany boiynsha óńirler arasynda úzdik boldy. Eldiń eńsesin kóterdińizder. Kók týymyzdy jelbiretken qyrandarymyzǵa alǵysymdy bildiremin! Bizdiń bilekti, júrekti batyrlarymyz Kóshpendiler oiyndarynyń qaharmandaryna ainaldy.
Sizderge zor densaýlyq, otbasylaryńyzǵa amandyq, baq-bereke tileimin! Memleket Basshysy Qasym-Jomart Kemeluly halyqqa arnaǵan Joldaýlarynda ult densaýlyǵyn saqtaý, sportty damytý máselesine erekshe kóńil bólip keledi. Oblysta turǵyndarymyzdyń salaýatty ómir saltyn qalyptastyrý jáne buqaralyq sportty damytý maqsatynda sońǵy 3 jylda 115 sport nysany paidalanýǵa berildi. Olardyń arasynda «Túrkistan Arena» stadiony, «Muz saraiy», «Tennis ortalyǵy», «Olympic Center» sport kesheni jáne ózge de nysandar bar. Biyl da kóptegen sport nysanyn paidalanýǵa berý kózdelip otyr. Budan bólek, Túrkistan qalasynda zamanaýi úlgidegi atshabar salý josparlanýda. Ulttyq sport túrlerine qoldaý kórsetý jalǵasady. Qazaq eliniń sport salasyndaǵy jetistikteri men tabystary arta bersin! – dedi Darhan Satybaldy.
Kóshpendiler oiyndarynyń jeńimpazdaryna – 1 mln, kúmis júldegerge – 700 myń jáne qola júldegerlerge 500 myń teńgeniń sertifikattary tapsyryldy.
Aýdaryspaqtan álemniń myqtysy, Kóshpendiler oiyndarynyń jeńimpazy Syrym Izbasarov sportshylar atynan óńir basshysyna qoldaýy úshin alǵysyn bildirdi.
Túrkistan oblysynyń 4 jigiti kókpar quramasy sapynda chempion atansa, aýdaryspaqtan 5 altyn, 1 kúmis medal enshiledi. Sonymen birge ovari, jamby atý, qazaq kúresi, kúshtiler saiysy, teńge ilý, asyq atý sport túrlerinen de qorjynǵa altyn júldeler tústi. Kók bóri, ordo, alysh, kýrash, qusbegilik, jamby atý sport túrlerinen kúmister men qola medaldar buiyrdy.
Chempiondar qatarynda Aikóz Eralhan, Batyr Beksaýyt (jamby atý), Aijan Jylqybaeva (qazaq kúresi), Azamat Maqulbekov (kúshtiler saiysy), Rahat Qambarov (teńge ilý), Ásel Dalieva (ovari), Amandos Aitqulov (asyq atý), Ermek Quralbai, Almat Látipbek, Daryn Ótkelbai, Syrym Izbasarov, Birjan Qosaliev (aýdaryspaq), Dáýlet Aitan, Arman Jamalbekov, Abylaihan Nyshanbekov jáne Ádilet Mamyt (kókpar) bar.
