استانادا V دۇنيەجۇزىلىك كوشپەندىلەر ويىندارى ءوتتى. ءدۇبىرلى سىنعا الەمنىڭ 89 ەلىنەن 2500-گە جۋىق سپورتشى قاتىستى. ايتۋلى باسەكەدە قازاقستان قۇراماسىنىڭ سپورتشىلارى 43 التىن، 32 كۇمىس جانە 37 قولا جۇلدە ەنشىلەدى. ورتاق جەڭىسكە تۇركىستان وبلىسىنان بارعان 32 سپورتشى دا ۇلەس قوستى. ءوڭىر سپورتشىلارى 16 التىن، 10 كۇمىس، 5 قولا جۇلدەنى يەلەنىپ، رەسپۋبليكادا وزدەرىنىڭ ۇزدىك ەكەندەرىن دالەلدەدى. بۇگىن تۇركىستان وبلىسىنىڭ اكىمى دارحان ساتىبالدى كوشپەندىلەر ويىندارىنىڭ جەڭىمپازدارى مەن جۇلدەگەرلەرىن قابىلداپ، قۇرمەت كورسەتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– قازاق ەلىندەگى ءدۇبىرلى دودا جوعارى دەڭگەيدە ۇيىمداستىرىلدى. حالقىمىزدىڭ عانا ەمەس، كوشپەندىلەردىڭ تاريحى، مادەنيەتى، سپورتى تانىستىرىلىپ، ابىرويىمىز اسپاندادى. تۇركىستان وبلىسىنىڭ سپورتشىلارى وتە تابىستى ونەر كورسەتىپ، جۇلدە سانى بويىنشا وڭىرلەر اراسىندا ۇزدىك بولدى. ەلدىڭ ەڭسەسىن كوتەردىڭىزدەر. كوك تۋىمىزدى جەلبىرەتكەن قىراندارىمىزعا العىسىمدى بىلدىرەمىن! ءبىزدىڭ بىلەكتى، جۇرەكتى باتىرلارىمىز كوشپەندىلەر ويىندارىنىڭ قاھارماندارىنا اينالدى.
سىزدەرگە زور دەنساۋلىق، وتباسىلارىڭىزعا اماندىق، باق-بەرەكە تىلەيمىن! مەملەكەت باسشىسى قاسىم-جومارت كەمەل ۇلى حالىققا ارناعان جولداۋلارىندا ۇلت دەنساۋلىعىن ساقتاۋ، سپورتتى دامىتۋ ماسەلەسىنە ەرەكشە كوڭىل ءبولىپ كەلەدى. وبلىستا تۇرعىندارىمىزدىڭ سالاۋاتتى ءومىر سالتىن قالىپتاستىرۋ جانە بۇقارالىق سپورتتى دامىتۋ ماقساتىندا سوڭعى 3 جىلدا 115 سپورت نىسانى پايدالانۋعا بەرىلدى. ولاردىڭ اراسىندا «تۇركىستان ارەنا» ستاديونى، «مۇز سارايى»، «تەننيس ورتالىعى»، «Olympic Center» سپورت كەشەنى جانە وزگە دە نىساندار بار. بيىل دا كوپتەگەن سپورت نىسانىن پايدالانۋعا بەرۋ كوزدەلىپ وتىر. بۇدان بولەك، تۇركىستان قالاسىندا زاماناۋي ۇلگىدەگى اتشابار سالۋ جوسپارلانۋدا. ۇلتتىق سپورت تۇرلەرىنە قولداۋ كورسەتۋ جالعاسادى. قازاق ەلىنىڭ سپورت سالاسىنداعى جەتىستىكتەرى مەن تابىستارى ارتا بەرسىن! – دەدى دارحان ساتىبالدى.
كوشپەندىلەر ويىندارىنىڭ جەڭىمپازدارىنا – 1 ملن، كۇمىس جۇلدەگەرگە – 700 مىڭ جانە قولا جۇلدەگەرلەرگە 500 مىڭ تەڭگەنىڭ سەرتيفيكاتتارى تاپسىرىلدى.
اۋدارىسپاقتان الەمنىڭ مىقتىسى، كوشپەندىلەر ويىندارىنىڭ جەڭىمپازى سىرىم ءىزباساروۆ سپورتشىلار اتىنان ءوڭىر باسشىسىنا قولداۋى ءۇشىن العىسىن ءبىلدىردى.
تۇركىستان وبلىسىنىڭ 4 جىگىتى كوكپار قۇراماسى ساپىندا چەمپيون اتانسا، اۋدارىسپاقتان 5 التىن، 1 كۇمىس مەدال ەنشىلەدى. سونىمەن بىرگە وۆاري، جامبى اتۋ، قازاق كۇرەسى، كۇشتىلەر سايىسى، تەڭگە ءىلۋ، اسىق اتۋ سپورت تۇرلەرىنەن دە قورجىنعا التىن جۇلدەلەر ءتۇستى. كوك ءبورى، وردو، الىش، كۋراش، قۇسبەگىلىك، جامبى اتۋ سپورت تۇرلەرىنەن كۇمىستەر مەن قولا مەدالدار بۇيىردى.
چەمپيوندار قاتارىندا ايكوز ەرالحان، باتىر بەكساۋىت (جامبى اتۋ)، ايجان جىلقىبايەۆا (قازاق كۇرەسى)، ازامات ماقۇلبەكوۆ (كۇشتىلەر سايىسى)، راحات قامباروۆ (تەڭگە ءىلۋ)، اسەل دالييەۆا (وۆاري)، اماندوس ايتقۇلوۆ (اسىق اتۋ)، ەرمەك قۇرالباي، المات لاتىپبەك، دارىن وتكەلباي، سىرىم ءىزباساروۆ، ءبىرجان قوسالييەۆ (اۋدارىسپاق)، داۋلەت ايتان، ارمان جامالبەكوۆ، ابىلايحان نىشانبەكوۆ جانە ادىلەت مامىت (كوكپار) بار.
