“Bizdi qarsylas qurly kórmesi anyq”. Sport sarapshylary “Qairat” pen “Real Madrid” matchyna boljam jasady

Búgin, 30 qyrkúiekte "Qairat" pen "Real Madrid" fýtbol klýbtarynyń arasynda tarihi match ótpek. Qazaqstandyq klýb úshin bul oiyn — úlken tájiribe alańy bolmaq. Osyǵan orai sport sarapshylary Dalanews.kz agenttigine aldaǵy oiynǵa qatysty óz boljamdaryn bólisti.

Belgili sport jýrnalisi Sáken Sybanbai “Qairattyń” jeńiske jetý múmkindigine kúmánmen qaraitynyn jetkizdi. Aitýynsha, bul syn qazaqstandyq sport klýby úshin ońaiǵa soqpaidy.

""Qairattyń" Chempiondar ligasynyń negizgi kezeńine shyǵýynyń ózi úlken olja. Bul - Eýropanyń myqty fýtbol ujymdarymen oinap, tájiribe jinaý úshin taptyrmas múmkindik. Qazaqstan deńgeiinde úzdik sanalǵanymen, "Qairattyń" álemdik deńgeidegi kúshti komandalarmen básekelesýge qaýqary shamaly. Ótkende "Sportingtiń" (Portýgaliia) ózi bizdi shemishkeshe shaǵyp tastady. Al ÝEFA reitinginde 1-orynda turǵan "Realdyń" bizdi tipti qarsylas qurly kórmesi anyq. Esep 0:3 bolady dep oilaimyn. Onda da ispandyqtar soǵan toqmeiilsip, qanaǵat qyp, toqtap qalsa. Áitpese odan da iri eseppen masqara bolýymyz yqtimal”, – deidi ol.

Sózinshe, oiyn barysynda negizgi salmaq qaqpashy men qorǵanysqa túspek.

""Realdyń" aqboran shabýylyna tótep berý ońai emes. Jas qaqpashymyzdyń qolyna Qudai qýat bersin deiik. Sorokin, Mrynskii, Tapalov sekildi artqy shep oiynshylary úshin úlken syn bolǵaly tur. Al alǵy sheptegi Sátbaev, Gromyko, Jorjinolarda gol soǵýǵa múmkindik týa ma, jalpy olardyń aiaǵyna dop tie me - boljaý qiyndaý. Jalpy oiyndy álsiz ǵana úmit aralas qaýippen kútip otyrmyn”, – dep qosty sarapshy.

“Bul oiynda kóp gol bolmaidy. Bar bolǵany úsh gol tirkelýi múmkin. Ári ketse, bir gol aiyrmasymen jeńilýimiz yqtimal. Esep 2:1 bolýy ǵajap emes”, – deidi ol.

Oqastyń pikirinshe, qazaqstandyq klýbta Dastan Sátbaev erekshe kózge túsýi múmkin.

“Bul matchta sheshýshi ról atqarýy yqtimal oiynshylar bar. “Real” jaǵynan Kilian Mbappe gol soǵýy ábden múmkin. Al bizdiń quramnan Dastan Sátbaevtyń juldyzy janatyn kez keldi dep senemin. Ol biraz ýaqyttan beri Chempiondar ligasynda gol soqqan joq. Yrymshyl halyqpyz ǵoi, bálkim, dál osy kezdesýde joly ashylar”, – deidi sarapshy.

Ol “Qairattyń” taktikasy jaily da sóz qozǵady.

“Qorǵanysqa tyǵylyp jatýdyń paidasy joq. “Real” báribir qorǵanysty buzyp ótedi. Sondyqtan shabýyldaýǵa tiis. Jeńiske jetý qiyn, biraq teń nátijege qol jetkizýge bolady”, – dep qorytyndylady ol.

Sport sarapshysy Esei Jeńisuly da qazaqstandyq klýbtyń jeńiske jetý múmkindigin tómen baǵalady.

“Qairattyń jeńiske jetý yqtimaldyǵy shamamen 27-37 paiyz aralyǵynda. Biraq bul az kórsetkish emes. Óitkeni mundai deńgeidegi qarsylaspen oinaý úshin árbir sátti tiimdi paidalaný qajet. Sportingpen ótken kezdesýden biz Qairattyń oiynynda ushqyn bar ekenin baiqadyq. Demek, komanda ózin barynsha kórsetse, sensatsiia jasaýǵa áleýeti bar. Meniń jeke boljamym – Qairat 2:1 esebimen jeńiske jetýi múmkin. Árine, bul optimistik kózqaras, biraq dál osyndai múmkindikti paidalaný kerek”, — deidi ol.

Jeńisuly oiynda sheshýshi ról atqaratyn oiynshylarǵa da toqtaldy.

“Negizgi nazar Realdyń kil myqtylaryna aýady. Ásirese, Kilian Mbappe men Djýd Bellingemniń oiyny Qairat qorǵanysyna úlken syn bolmaq. Qorǵaýshylarymyz Mbappeni ustai ala ma – negizgi saýaldyń biri osy. Al Qairat jaǵynan boiy alasa, jyldam oiynshylardy shabýyl ortasyna qoiýdyń qajeti joq dep oilaimyn. Máselen, Jorjino men Dastan Sátbaev sekildi fýtbolshylardy qaptalǵa shyǵarǵan durys. Shabýylǵa Edmilson shyqsa, oǵan Din Heison, David Alaba, Raýl Asensio, Orelen Chýameni qoldaý kórsetkeni tiimdi bolar edi. Jalpy, bul oiynda árbir oiynshy ózin Eýropaǵa tanytýǵa tiis. Qazaq dalasynda da talantty fýtbolshylar baryn dáleldeýdiń naǵyz sáti osy. Óz basym Dastan Sátbaevtan, Valerii Gromyko jáne Sherhan Qalmyrzadan úlken úmit kútemin”, — deidi ol.

Sarapshynyń aitýynsha, “Qairat” ádettegi oiyn úlgisinen aýytqymaýy tiis.

“Bir shabýylshyny alǵa shyǵaryp, qaptaldan qoldaý kórsetkeni jón. Biraq bastysy – bas-kózsiz alǵa umtylmaý kerek. Óitkeni qorǵanys bosańsysa, Realdyń shyǵarmashyl oiynshylaryna erkin óris berip qoiasyń. Sondyqtan ár shabýyldy oilanyp, eseppen jasaý qajet”, — dep túiindedi ol.