Almatyda Prezident Qasym-Jomart Toqaevtyń tóraǵalyǵymen Jasandy intellektini damytý jónindegi keńestiń ekinshi otyrysy ótti, dep habarlaidy dalanews.kz.
Qasym-Jomart Toqaev ekonomikany tsifrlandyrý tiimdiligin arttyrý úshin ólshemdi kórsetkishter qajet ekenin eske saldy.
"Esepsiz nemese kózge kórinbeitin dúnieni basqarý qiyn. Sondyqtan Úkimet kóp sozbai, vedomstvolar deńgeiindegi jaǵdaiǵa bazalyq esep júrgizetin júieni qoldanysqa engizgeni jón. Buǵan salǵyrt qaraýǵa bolmaidy, jumysty keshiktirmeý kerek. Tsifrlandyrý men memlekettik jobalardyń paidasyn jan-jaqty zerdeleý qajet. Úkimet Digital Qazaqstan strategiiasy aiasynda "izashar jobalardy" iriktep shyǵardy. Olardy muqiiat saraptap, ekonomikaǵa tikelei áserin anyqtaý kerek. Jalpy, qai salada bolsyn, túpki nátijege jetý úshin árkim jeke jaýapkershilikten qashpaýy qajet. Bizde basqa tańdaý joq: ne tiimdi tsifrlyq ekonomika quramyz, ne órkeniet kóshiniń sońynda qalamyz. Basqasha aitqanda, "ne bolamyz, ne bordai tozamyz", – dedi Prezident.
Memleket basshysynyń aitýynsha, ziiatkerlik kapitaldy kúsheitip, eńbek ónimdiligin arttyrmasa, tek demografiialyq ósim básekege qabiletti el bolýǵa kepildik bermeidi.
"Keńestiń osyǵan deiingi otyrysynda qabyldanǵan sheshimge sai biyl Ortalyq Aziiadaǵy alǵashqy Jasandy intellekt ýniversiteti ashylady. Sheteldik joǵary oqý oryndarymen seriktestik qurý arqyly irgeli jáne qoldanbaly ǵylymdy damytýdy qolǵa aldyq. Birneshe jobanyń tizimi jasaldy. Olar barynsha jedel taratylýǵa tiis. Úkimet qysqa merzim ishinde "ǵylymnan naryqqa deiingi" kezeńderdi túgel qamtityn tizbek jasaýy kerek", – dedi Memleket basshysy.
