Partıa belsendileri kópbalaly jáne tolyq emes otbasylardyń balalaryna, sondaı-aq erekshe bilim berý qajettilikteri bar balalar úshin elimiz boıynsha keńse taýarlary, mektep jáne sport kıimderi, sómkelermen jáne basqa da qajetti zattar satyp aldy.
Sonymen qatar, partıanyń Ortalyq apparaty bastaýysh partıalyq uıymynyń músheleri bıyl jalpy somasy 1,2 mln teńgege 67 balaǵa kómek kórsetti. Al, elimiz boıynsha nurotandyqtar jalpy somasy 593,4 mln teńgege 41 558 balany mektepke daıyndaýǵa kómektesti.
– Aramyzda osyndaı janashyr partıalastarymyzdyń kóp bolǵany qýantady. Bizdiń kúshimiz – birlikte! Osyndaı ıgi isteri úshin barlyq partıalastaryma alǵysymdy bildiremin. Balalarǵa búgingi kúni jasaǵan qamqorlyq – olardyń erteńgi kúni elimizge laıyqty azamat bolyp ósýine qosqan úlesimiz. Osy aksıanyń uıytqysy – «Baqytty otbasy» partıalyq jobasy, – dep atap ótti Ortalyq apparattyń BPU tóraǵasy Arystanǵalı Aryn.
Jalpy, onyń aıtýynsha, «Nur Otan» balalardy qorǵaý jáne otbasy ınstıtýtyn qoldaý máselelerine jiti kóńil bólip otyrady.
Bıylǵy jyldyń birinshi jartyjyldyǵynda «Baqytty otbasy» jobasy aıasynda ómirlik qıyn jaǵdaıda júrgen 136 myńnan astam otbasyǵa ataýly áleýmettik kómek kórsetildi. Az qamtylǵan otbasylardan shyqqan 17 myńnan astam bala baseınder men sport klýbtaryna tegin barý múmkindigine ıe boldy. Toǵyz oblysta 545 tegin úıirme jáne 135 myńnan astam balaǵa arnalǵan 70 aýla klýby ashyldy.
Sondaı-aq, partıa janynda Otbasy, áıelder jáne balalardyń quqyqtaryn qorǵaý máseleleri jónindegi respýblıkalyq qoǵamdyq keńes, «111 jedel qyzmeti» arnaıy baılanys ortalyǵy, sondaı-aq 2,3 myńnan astam jedel áreket etý toby belsendi jumys isteıdi. 2025 jylǵa deıin ár qala men aýdanda ómirlik qıyn jaǵdaıǵa tap bolǵan otbasylar men balaly analardy qoldaý boıynsha 234 ortalyq ashylady.
