Qyrǵyzstan prezidentiniń baspasóz hatshysy Ashat Alagózov "Bishkek Arena" stadionynyń qurylysyna qatysty tolyq aqparat berdi. Onyń aitýynsha, stadion 386 million dollarǵa salynǵan. Ol "nysan 60 million dollarǵa salyndy" degen aqparat shyndyqqa janaspaitynyn málimdedi, dep habarlaidy dalanews.kz.
Ashat Alagózovtiń sózinshe, qurylys bastapqyda 30-35 myń kórermenge arnalǵan kádimgi stadion retinde josparlanǵan. Sol kezde onyń quny shamamen 60-70 million dollar bolady degen boljam aitylǵan.
Keiin Qyrǵyzstan prezidenti Sadyr Japarov bastapqy jobany ózgertip, stadiondy kiiz úi pishininde salýdy tapsyrǵan. Jobaǵa saýda ortalyqtary, meiramhanalar men dámhanalar, sýpermarket, kinoteatrlar, sport zaldary jáne balalar alańy engizilgen.
Osyǵan bailanysty joba tolyq qaita jasalyp, ǵimarattyń jalpy aýdany 194 248 sharshy metrge jetken. Stadionnyń syiymdylyǵy da 52 myń kórermenge deiin ulǵaitylǵan. Buǵan qosa, "halyqaralyq deńgeidegi jarystardy ótkizý úshin stadionda keminde 50 myń oryn bolýy kerek" degen FIFA talaby da eskerilgen.
"Bishkek Arena" stadionynyń negizgi sipattamalary: jer ýchaskesiniń aýmaǵy - shamamen 20 gektar; qurylystyń jalpy aýdany - 194 248 sharshy metr; nysannyń diametri - 280 metr; biiktigi - 70 metr; 8 qabat; kórermenderge arnalǵan 51 252 oryn bar; smetalyq quny - 386 million dollar.
Saýda jáne kommertsiialyq infraqurylymǵa 35 916 sharshy metrlik saýda ortalyǵy, 48 dúken, bir sýpermarket, 18 saýda dúńgirshegi, 23 meiramhana, 11 dámhana, tórt kinoteatr zaly, balalar oiyn alańy jáne sport zal kiredi. Sonymen qatar, jalpy aýmaǵy 5 087 sharshy metr bolatyn terrasalar bar.
"Ókinishke qarai, keiingi kúnderi "bizdiń stadion 60 million dollarǵa salyndy, al kórshi elderdegi stadiondar osyndai somaǵa turǵyzyldy" degen pikir aityla bastady. Mundai salystyrýlar kórshi memleketterdiń basshylarynyń bedeline kúmán keltirýi múmkin. Sondyqtan, qurmetti otandastar, bul máseleni saiasilandyrmai, kórshi eldermen qarym-qatynasty ýshyqtyrmaiyq", - dedi ol.
