Qýandyq Bishimbaevtyń burynǵy jubaiy Nazym Qaharman burynǵy enesi Almira Nurlybekovanyń ózinen shamamen 25 million teńge óndirý týraly sotqa talap-aryz bergenin aitty. Bul týraly ol áleýmettik jelidegi paraqshasynda málimdedi, dep habarlaidy dalanews.kz.
Nazym Qaharmannyń aitýynsha, daý 2011 jyldan beri ózi basqarǵan fitnes-klýbqa bailanysty týyndaǵan. Onyń sózinshe, sol kezde burynǵy enesimen senimgerlik basqarý týraly kelisim jasalǵan.
«Nekede turǵan kezde burynǵy kúieýimniń týystary biznesten túsken tabysqa qatysty eshqandai talap qoiǵan joq. Alaida arada birneshe jyl ótken soń burynǵy enem bul qarajatty sot arqyly óndirip alýǵa áreket jasap otyr. Maǵan shamamen 25 million teńge kóleminde talap-aryz tústi. Bul – sońǵy eki jyl ishinde maǵan qarsy berilgen tórtinshi talap», – dedi Nazym Qaharman.
Onyń aitýynsha, ekinshi balasy dúniege kelgennen keiin korporativtik qyzmetten ketip, burynǵy kúieýiniń anasynyń atyna rásimdelgen ǵimarattaǵy fitnes-klýbty damytýǵa kirisken. Sol kezde mundai kelisimniń keiin quqyqtyq saldary bolýy múmkin ekenin oilamaǵanyn jetkizdi.
Qaharman burynǵy enesiniń qarjylyq talaby fitnes-klýb qyzmetinen túsken tabysqa qatysty ekenin aitty. Sonymen qatar ol bul jaǵdaiǵa bailanysty óz pikirin bildirip, janjaldyń sebebi retinde otbasylyq qarym-qatynastardy atady.
Aita keteiik, burynǵy Ulttyq ekonomika ministri Qýandyq Bishimbaev 2023 jyly jubaiy Saltanat Núkenovany óltirgeni úshin sot úkimimen 24 jylǵa bas bostandyǵynan aiyrylǵan.
