Qyrǵyzstan astanasy Bishkektegi №33 mektep-gimnaziiaǵa qazaqtyń kórnekti jazýshysy, Qazaqstan Prezidenti Qasym-Jomart Toqaevtyń ákesi Kemel Toqaevtyń esimi berildi. Bul týraly KaktusMedia málimdedi, dep habarlaidy Dalanews.kz.
Prezidenttiń baspasóz hatshysy Ashat Alagózovtiń málimdeýinshe, bul bastama Qyrǵyz Respýblikasy prezidenti Sadyr Japarovqa tiesili.
“Japarov bul sheshimdi Qasym-Jomart Kemelulyna Reseige jasaǵan jumys sapary kezinde aitqan. Uly Otan soǵysy jyldary Kemel Toqaev qazirgi №33 mektep ornalasqan ǵimaratta jumys istegen, Frýnze jaiaý ásker ýchilishesinde bilim alǵan. Dál osy jerden maidanǵa attanǵan”, – delingen resmi habarlamada.
Aita keteiik, Kemel Toqaev (1923 jylǵy 2 qazan, Almaty oblysy, Qaratal aýdany, Kálpe aýyly – 1986 jylǵy 6 qazan, Almaty) – qazaqtyń kórnekti keńestik jazýshysy, jýrnalist, redaktor, qazaq ádebietindegi detektiv janrynyń negizin qalaýshy. Ol – Uly Otan soǵysynyń ardageri, Stalingrad shaiqasyna qatysqan jaýynger. «Erligi úshin» medali jáne basqa da áskeri marapattardyń iegeri.
Soǵystan keiin QazMÝ-diń filologiia fakýltetin bitirip, respýblikalyq basylymdarda redaktor, bas redaktor qyzmetterin atqardy. Atap aitqanda, «Qazaqstan pioneri», «Sotsialistik Qazaqstan» gazetterinde, sondai-aq 1960–1977 jyldary Qazaq KSR Joǵarǵy Keńesiniń «Vedomostarynyń» bas redaktory boldy.
Onyń «Sońǵy soqqy», «Tanymsyz iz», «Soldat soǵysqa ketti» syndy shyǵarmalary qazaq detektivi men shytyrman oqiǵaly prozasynyń klassikasyna ainalyp, ulttyq ádebiettiń damýyna zor úles qosty.
2025 jylǵy 9 mamyrda – Jeńistiń 80 jyldyǵy qarsańynda, Máskeýde jazýshynyń uly – Qazaqstan Prezidenti Qasym-Jomart Toqaevqa ákesiniń atyna resimdelgen marapat paraǵy tabystaldy. Qujatta Kemel Toqaevqa Uly Otan soǵysyna qatysýshy retinde beriletin eń joǵary nagrada – Keńes Odaǵynyń Batyry ataǵy kórsetilgen.
