- Búgingi tańda QHR-dan Qazaqstanǵa 25 858 adam keldi, olar - bizdiń eldiń jáne sheteldik azamattar. Olardyń barlyǵyna qatysty derekter jergilikti atqarýshy organdardaǵy baqylaý komitetterine jiberilip, sol azamattarǵa qońyraý shalynady.
Búgingi kúni 23 adamnyń ystyǵy bary anyqtaldy, olardyń 7-i baqylaýda, 4 adam túrli infektsiia kúdigimen aýrýhanaǵa jatqyzyldy, qannan analiz alyndy.
Biz, negizinen, JRVI-ge kúdiktenip, olardy aýrýhanaǵa jatqyzdyq. Tolyq diagnostika úsh kún ishinde jasalady, - dedi Birtanov.
Ol 6 qańtardan bastap bas memlekettik sanitarlyq inspektor sheshimimen infektsiianyń taralýyn boldyrmaý úshin baqylaý kúsheitilip jatqanyn eske saldy.
Ministr mundai sharalar, eń aldymen, Qazaqstanǵa syrttan kelgen barlyq azamattardy tekserý, barlyq shekaralyq ótkizý pýnktterindegi baqylaýdy kúsheitý arqyly júzege asyrylǵanyn aitty.
- Eger indetke ie bola almai qalǵan jaǵdaida 4,5 myńnan astam oryn daiyn. Bul búkil elimiz boiynsha bar tósek-oryn, odan bólek barlyq aimaqtarda jattyǵýlar ótkizildi, meditsinalyq qyzmetkerler arasynda qosymsha túsindirý jumystary júrgizilip jatyr, - dedi ministr.
Sondai-aq, ol naýqastar sany kóbeigen jaǵdaida memleket rezervinen qosymsha qarjy suraityndaryn aitty.
- Biz naýqastar sany kúrt artsa qosymsha Úkimet rezervinen qarjy suraimyz. Mundaida jeke qorǵanys quraldary, meditsinalyq maqsattaǵy buiymdar men dezinfektsiialyq quraldar qosymsha satyp alynady. Biz dári-dármekter men meditsinalyq maqsattaǵy buiymdardyń qosymsha rezervterin qurdyq, - dedi Densaýlyq saqtaý ministrliginiń basshysy.
Ministr Qytaidan kelgen barlyq qazaqstandyqtarǵa turǵylyqty jeri boiynsha meditsinalyq mekemelerge baryp, jergilikti terapevtke qaralýdy suraidy.
- Qytaidan kelgen barlyq Qazaqstan azamattaryna qulaqqaǵys etemiz. Barlyǵyńyzǵa birdei qońyraý shalyp, habarlasý múmkin bolmaýy yqtimal, sondyqtan óz betterińizshe jaqyn mańdaǵy emhanalarǵa baryp, dárigerlerge tirkelip, densaýlyqtaryńyzǵa qatysty másele bar-joǵyn bilip-surańyzdar. Bul óz qaýipsizdikterińiz úshin ǵoi, bizdiń mamandar birden qadaǵalaýǵa alady, aiaq-asty densaýlyǵyńyz nasharlasa, birden qabyldaidy olar, - dep sózin túiindedi Birtanov.
